საგარეო საქმეთა მინისტრის მოადგილე გიგი გიგიაძე იმედოვნებს, რომ საქართველოს ერთობლივი ძალისხმევა სასურველ შედეგს გამოიღებს და წლის ბოლოს, ევროკავშირთან სავიზო რეჟიმის ლიბერალიზაციის პროცესი წარმატებით დასრულდება.
უვიზო მიმოსვლის თაობაზე, საქართველოს შანსების შესახებ გიგიაძემ პარლამენტის სამი კომიტეტის გაერთიანებულ სხდომაზე ისაუბრა.
გიგიაძის განმარტებით, ევროკომისიის საბოლოო რეკომენდაციისა და ევროკავშირის საბჭოს მიერ შესაბამისი პოლიტიკური გადაწყვეტილების მიღების შემთხვევაში, ევროკავშირის რეგულაციაში შეტანილი იქნება - N539/2001 ცვლილება და საქართველოს მოქალაქებისათვის შენგენის ქვეყნებში უვიზო მიმოსვლის რეჟიმი ამოქმედდება.
მისი განცხადებით, ამჟამად, ევროკავშირში შექმნილი მიგრაციული კრიზისის გამო, არსებული პოლიტიკური ფონი საკმაოდ არახელსაყრელია, თუმცა, ქართული მხარე იმედს გამოთქვამს, რომ ეს მოვლენები საქართველოსთან სავიზო რეჟიმის ლიბერალიზაციის პროცესზე ზეგავლენას არ იქონიებს.
„სექტემბრის ბოლოს, საქართველოში, ევროკავშირის შემფასებელი მისიების ვიზიტიები 4 მიმართულებით განხორციელდა: მიგრაცია, თავშესაფარის პოლიტიკა, ტრეფიკინგისა და კორუფციის წინააღმდეგ ბრძოლა. ექსპერტების წინასწარი შეფასებების გათვალისწინებით, მისიები წარმატებულად შეიძლება მივიჩნიოთ. დარჩენილ 4 სფეროში (ნარკოტიკები, ფულის გათეთრება, სამართალდამცავ სფეროში თანამშრომლობა და ადამიანის უფლებები) მიღწეული პროგრესის შეფასება ევროკომისიის მიერ წერილობითი ანგარიშის საფუძველზე მოხდება. ჩვენი მოლოდინია, რომ ევროკომისიის ანგარიში საბოლოო იქნება, რომლის თანახმად, ევროკომისია რეკომენდაციის მიმართავს ევროკავშირის საბჭოსსა და ევროპარლამენტს, საქართველოს მოქალაქეთათვის უვიზო მიმოსვლის რეჟიმის ამოქმედების შესახებ შესაბამისი პოლიტიკური გადაწყვეტილებების მისაღებად“, - განაცხადა გიგიაძემ.
