საგარეო საქმეთა მინისტრის მოადგილის, გიგი გიგიაძის განცხადებით, სავიზო რეჟიმის ლიბერალიზაციის შესახებ ევროკომისიის 2015 წლის 8 მაისის ანგარიშის თანახმად, სამოქმედო გეგმის 7 მიმართულება შესრულებულად ჩაითვალა.
გიგი გიგიაძემ ასოცირების ხელშეკრულების შესრულების პროცესზე, პარლამენტის სამი კომიტეტის გაერთიანებულ სხდომაზე ისაუბრა.
მისი ინფორმაციით, გარკვეულ სფეროებში, რომლებიც თითქმის შესრულებულად (მიკრაციის მართვა, ფულის გათეთრება, სამართალდამცავ სფეროში თანამშრომლობა, ადამიანის უფლებები) ან ნაწილობრივ შესრულებულად (კორუფცია, ტრეფიკინგი, ნარკოტიკები, თავშესაფარი) იქნა მიჩნეული, ევროკომისიამ რეკომენდაციები შეიმუშავა, რომელთა იმპლემენტაციის შემდეგ, საქართველოს მიერ სამოქმედო გეგმის განხორციელების პროცესი დასრულებულად ჩაითვლება.
მისი თქმით, საქართველოს ხელისუფლება ევროკომისიის ანგარიშის გამოქვეყნებისთანავე რეკომენდაციებით განსაზღვრული ღონისძიებების განხორციელებას შეუდგა და მოკლე პერიოდის განმავლბაში, შესაბამისმა უწყებებმა საკმაოდ მოცულობითი სამუშაო შეასრულეს.
გიგიაძის ინფორმაციით, საქართველოს მთავრობისა და პარლამენტის აქტიური ერთობლივი მუშაობის შედეგად, საერთო ჯამში, მიღებულ იქნა 15-მდე საკონმდებლო ცვლილება, ახალი სტრუქტურული ერთეულები შეიქმნა, შესაბამისი ინსტრუქციები და რეგულაციები შემუშავდა, ახალი სერვისები დაინერგა და VLAP-ით განსაზღვრულ მიმართულებებით საინფომაციო კამპანიები გააქტიურდა.
