„თავისუფალი დემოკრატები“ ბოლო დროს მათ წინააღმდეგ მიზანმიმართულ კამპანიას პარტიის გააქტიურებასა და ზრდის ტენდენციას უკავშირებენ. როგორც პარტიის მიერ გავრცელებულ განცხადებაშია ნათქვამი, „თავისუფალი დემოკრატები“ არჩევნებზე დამოუკიდებლად გავლენ. შესაბამისად, ისინი საკუთარ ამომრჩეველს პირობას აძლევენ, რომ მომავალ არჩევნებში გამარჯვებას მოიპოვებენ. მათივე თქმით, პარტიის გეგმებს ვერავითარი წინააღმდეგობა ვერ შეცვლის და ისინი დაწყებულ საქმეს ბოლომდე მიიყვანენ.
„ბოლო პერიოდია მიმდინარეობს მიზანმიმართული კამპანია „თავისუფალი დემოკრატების“ წინააღმდეგ. სახელმწიფო უშიშროების სამსახური ახორციელებს ზეწოლას პარტიის წევრებზე და ეს განსაკუთრებით თვალსაჩინო გახდა რეგიონული ორგანიზაციების წევრებთან მიმართებაში. ეს ყველაფერი „თავისუფალი დემოკრატების“ გააქტიურებით და პარტიის ზრდის ტენდენციითაა განპირობებული“, - ნათქვამია განცხადებაში.
„თავისუფალი დემოკრატების“ წევრების განცხადებით, ხელისუფლებისთვის კარგადაა ცნობილი, რომ პარტიის რეგიონული ორგანიზაციების გადახალისება მიმდინარეობს და მათ რიგებს ახალი წევრები უერთდებიან.
პარტიის წევრები მიიჩნევენ, რომ მათ წინააღმდეგ აგორებული შავი პიარი რეგიონული ორგანიზაციების გადახალისებას უკავშირდება.
„კატეგორიულად ვაცხადებთ, რომ არავითარი ალიანსი „ნაციონალურ მოძრაობასთან“ არ არსებობს და არც იარსებებს მარტივი მიზეზის გამო - ჩვენ დღესაც, ისევე, როგორც 2012 წელს ვგმობთ მმართველობის იმ მახინჯ ფორმას, რასაც „ნაცმოძრაობის“ ხელისუფლება წარმოადგენდა“, - აცხადებენ „თავისუფალი დემოკრატების“ წარმომადგენლები.
