თავისუფალი დემოკრატები დავით ზალკალიანმა დატოვა, - ეს ინფორმაცია რამდენიმე წუთის წინ პარტიის ხელმძღვანელმა ირაკლი ალასანიამ თავად დაადასტურა.
ალასანიას ინფორმაციით საგარეო საქმეთა მინისტრის ყოფილმა მოადგილემ პარტია დატოვა და ის სამუშაოდ ერთ-ერთ ფონდში გადავიდა. რაც შეეხება გავრცელებულ ინფორმაციას, რომ თავისუფალ დემოკრატებს სხვა წევრებიც ტოვებენ, ალასანიამ არ დაადასტურა.
"ეს არ არის დღევანდელი ამბავი. დავით ზალკალიანი არის ჩვენი პარტიის დამფუძნებელი, ერთ-ერთი მთავარი ფიგურა, რომელმაც შექმნა "თავისუფალი დემოკრატები". 6 თვით ადრე ჩვენ მივიღეთ გადაწყვეტილება, რომ მას გაეგრძელებინა მუშაობა ლევან მიქელაძის სახელობის ფონდში, რომელსაც მანამდე ლევან დოლიძე ხელმძღვანელობდა. არასამთავრობო სექტორში საქმიანობა, ბუნებრივია, არ უნდა იყოს აღრეული პოლიტიკურ საქმიანობასთან. ეს არის და ეს და ამ საკითხთან დაკავშირებით თითიდან გამოწოვილი ინსინუაციებს აქვს ადგილი ივანიშვილის მხრიდან. ამას ნუ მიაქცევთ ყურადღებას. ისე როგორც არასდროს, "თავისუფალი დემოკრატები" არის ერთიანი, ჩვენ ვძლიერდებით და გუშინ ახალი წევრიც შემოგვემატა, რაც გაგრძელდება", - განაცხადა ირაკლი ალასანიამ.
"ნუ ჰგონია ბიძინა ივანიშვილს, რომ თავისუფალი დემოკრატები დაიშლება. ჩვენ ვაგრძელებთ ბრძოლას და მზადებას არჩევნებისთვის,"- აცხადებს ირაკლი ალასანია.
თავდაცვის ყოფილმა მინისტრმა ეს განცხადება მცხეთაში გააკეთა. ირაკლი ალასანიამ საზოგადოებას სვეტიცხოვლობა მიულოცა.
