დევნილთა და განსახლების მინისტრის, სოზარ სუბარის განცხადებით, 2008 წლის შემდეგ, ევროკავშირმა საქართველოს 4,5 მილიარდი დოლარის დახმარება გაუწია და ამ თანხის ერთი მეოთხედი დევნილებზე რომ დახარჯულიყო, ქვეყანას დევნილი ოჯახები არ ეყოლებოდა.
პარლამენტის ადამიანის უფლებათა დაცვის კომიტეტის სხდომაზე, სუბარი ოპოზიციონერ დეპუტატს, გოგა ხაჩიძეს გამოეხმაურა, რომელმაც განაცხადა, რომ მინისტრი ისე საუბრობს, თითქოს წინა ხელისუფლებას დევნილებისთვის ბინები არ აუშენებია.
სუბარის მტკიცებით, ის კორუფციაში ბრალს არავის სდებს.
„2008 წლის შემდეგ, როცა ახალი დევნილები გაჩნდნენ, ევროკავშირის დახმარება გამოგვიყო და მშენებლობები ამ დახმარებით დაიწყო და არა ბიუჯეტის ფულით. 4,5 მილიარდი დოლარის ერთი მეოთხედი დევნილებზე რომ წასულიყო, დევნილი ოჯახები არ გვეყოლდებოდა. კორუფციაში ბრალს არავის ვდებ. ლაპარაკია იმაზე, სახელმწიფო თანხის დახარჯვას რაზე გადაწყვეტს - ლამაზი შუშის ხიდის და ანბანის კოშკის მშენებლობაზე, თუ დევნილების სახლების?! 2008 წლამდე, ნაციონალებს დევნლებისთვის ბინები არათუ არ აუშენებიათ, არამედ მათ ფოცხოეწერში ყრიდნენ“, - განაცხადა სუბარმა.
მინისტრის განცხადებით, სახელმწიფო ისეთ ადამიანებს ვერ დააკმაყოფილებს, რომელთაც სახლი თელავში აქვთ, მაგრამ ბინა ვაკეში უნდათ.
„ამ შემთხვევაში, თელავში სახლი გაყიდონ და თბილისში ერთოთახიანი ბინა იყიდონ. აქციის უფლება ყველას აქვს, მაგრამ აქციის გამო სახლს რომ გვაძლევდნენ, სადღაც დავდგებოდით. 2017 წელს ისეთი დევნილი აღარ გვეყოლება, რომელიც მძიმე პირობებშია“, - დასძინა სუბარმა.
