„ნაციონალური მოძრაობა“ პარლამენტში ფინანსთა მინისტრ ნოდარ ხადურის მისვლას ითხოვს. პარლამენტის ბიუროს დღევანდელ სხდომაზე აღნიშნული საკითხი ოპოზიციონერმა დეპუტატმა, გიგი წერეთელმა დააყენა.
კანონმდებელის ცნობით, უმცირესობა 2016 წლის ბიუჯეტის პროექტის განხილვას მიმდინარე კვირის ხუთშაბათს გეგმავს.
„ფინანსთა მინისტრის არაერთი დაბარების მიუხედავად, ის ჩვენთან არ მოსულა. გიორგი კაკაურიძე იმაზე უფრო კარგად გავიცანით, ვიდრე ვიცნობდით, მაგრამ ახლა 2016 წლის ბიუჯეტის პროექტთან დაკავშირებით, ნოდარ ხადურის მოსვლა გვსურს“, - დასძინა წერეთელმა, რომელსაც პარლამენტის ვიცე-სპიკერი ზვიად ძიძიგური გამოეხმაურა.
ძიძიგურის ინფორმაციით, ფინანსთა მინისტრი პერუში იმყოფება, სადაც საერთაშორისო სავალუტო ფონდის დიდი ფორუმი მიმდინარეობს.
„რამდენადაც ვიცი, ის საქართველოში პარასკევს ჩამოდის“, - დასძინა ძიძიგურმა, რომლის პასუხის მოსმენის შემდეგ, წერეთელმა უმცირესობის სხდომის გადადება არ გამორიცხა.
პარლამენტში მომავალი წლის ბიუჯეტის პროექტი სექტემბრის ბოლოს შევიდა და მასზე კომიტეტები დარგების შესაბამისად მსჯელობენ.
