ფინანსთა მინისტრის მოადგილის, გიორგი კაკაურიძის განცხადებით, მთავრობა მზად არის, პენსიების ზრდასთან დაკავშირებით პარლამენტთან კონსულტაციები გამართოს.
პარლამენტის ჯანდაცვის კომიტეტის სხდომაზე, 2016 წლის ბიუჯეტის პროექტის განხილვისას, პენსიების ზრდის საკითხი კომიტეტის თავმჯდომარემ, დიმიტრი ხუნდაძემ დააყენა.
კაკაურიძის განცხადებით, მთავრობამ უნდა ნახოს, პენსიის ზრდა რამდენად არის შესაძლებელი.
„ამ საკითხის სამუშაო რეჟიმში გადატანა შეიძლება. პენსიების ზრდა არც საარჩევნო პერიოდს დ არც სხვა გარემოებებს არ უნდა უკავშირდებოდეს. როცა ზრდის რესურსი იყო, ეს გაკეთდა. წინასწარ ვერ ვიტყვით, პენსიის ზრდა რომელი კატეგორიისთვის და რა მიზნობრივი ჯგუფისთვის შეიძლება, მაგრამ თქვენს კომიტეტთან ერთად მუშაობა შესაძლებელია. ამ პროცესში მთავრობის ყველა წევრი უნდა იყოს ჩართული. პრიორიტეტები ასარჩევია და რესურსი გადასანაწილებელია. შესაძლოა, რესურსების კორექტირება მოხდეს. პენსიის ზრდის კონკრეტულ ციფრებს ვერ ვიტყვით, მაგრამ სამუშაოდ მზად ვართ და გადაწყვეტილება ერთად უნდა მივიღოთ - რომელი ჯგუფი პრიორიტეტია და პენსია რა დროიდან უნდა გაიზარდოს“, - განაცხადა კაკაურიძემ.
პარლამენტის შესაბამისი კომიტეტები ბიუჯეტის პროექტს დარგების მიხედვით იხილავენ.
