ორგანიზაცია "მოქალაქე" ბიძინა ივანიშვილის მიერ აფხაზეთში უძრავი ქონების შეძენით დაინტერესებას უარყოფს. საქართველოს ყოფილი პრემიერის ინტერესზე აფხაზეთში უძრავი ქონების შეძენასთან დაკავშირებით და ამით გამოწვეულ საფრთხეებზე აფხაზური მედია წერს. აფხაზი მეცნიერები მიიჩნევენ, რომ მკაცრად უნდა გაკონტროლდეს აფხაზეთში უძრავი ქონების გასხვისების ფაქტები.
"ამ დღეებში ზოგიერთი მედიასაშუალების მიერ, აფხაზურ წყაროებზე დაყრდნობით, გავრცელდა ინფორმაცია იმის თაობაზე, თითქოს ბატონ ბიძინა ივანიშვილს განზრახული აქვს აფხაზეთის ტერიტორიაზე მიწისა და სხვა სახის უძრავი ქონების შესყიდვა და ამისათვის მან სპეციალური ფონდიც კი შექმნა. ამასთან დაკავშირებით საჭიროდ მიგვაჩნია ოფიციალურად განვაცხადოთ, რომ ეს ინფორმაცია არ შეესაბამება სინამდვილეს და, შესაბამისად, ასეთი ფონდიც არ არსებობს", - ნათქვამია განცხადებაში, რომელიც ორგანიზაციის facebook გვერდზე განთავსდა.
