ბერძენ სამართალდამცველებთან მიღწეული შეთანხმების მიხედვით, მომდევნო დღეებში საქართველოს მოქალაქეებისთვის საჭირო დოკუმენტაციის მომზადება და გაცემა დაიწყება.
ამის შესახებ საგარეო საქმეთა სამინისტროს მიერ გავრცელებულ ინფორმაციაშია ნათქვამი, რომელიც უკანასკნელ პერიოდში, საბერძნეთში არალეგალურად ყოფნისთვის დაკავებული საქართველოს მოქალაქეების მდგომარებასა და საელჩოს მიერ გაწეულ სამუშაოს ასახავს.
საგარეო უწყების ინფორმაციით, 6-7 ოქტომბერს, საქართველოს კონსული ათენში და საქართველოს პოლიციის ატაშე, მთელი დღის განმავლობაში წინასწარი დაკავების იზოლატორში იმყოფებოდნენ და საქართველოს დაკავებულ მოქალაქეებს სათითაოდ ესაუბრნენ.
„ბერძენ სამართალდამცავებთან შეთანხმებული იქნა დროში გაწერილი გეგმა, რომლის მიხედვითაც, მომდევნო დღეებში საქართველოს მოქალაქეებისთვის საჭირო დოკუმენტაციის მომზადება და გაცემა დაიწყება, მათ შორის, დაპატიმრებული პირების საქართველოს საკონსულოში მიყვანის გზით“, - ნათქვამია ინფორმაციაში.
უწყების განმარტებით, ამჟამად, ათენში საქართველოს საელჩო, ბერძენ სამართალდამცველებთან მჭიდრო კომუნიკაციის გზით, დღის განმავლობაში დაკავებული მოქალაქეების მდგომარეობას რამდენჯერმე ამოწმებს და მათ მიმართ დაწყებული სამართალწარმოების პროცესის მონიტორინგს ახორციელებს. ასევე, ათენში საქართველოს კონსული და პოლიციის ატაშე საქართველოს მოქალაქეთა მდგომარეობის ადგილზე შემოწმების მიზნით, წინასწარი დაკავების იზოლატორს პერიოდულად სტუმრობენ.
„სამწუხაროდ, დაკავებულ ქართველებთან დაკავშირებით, ზოგიერთი ადგილობრივი ქართველი უპასუხისმგებლოდ ავრცელებს დაუზუსტებელ ინფორმაციას, მათ შორის, თითქოს დაკავებულები შიმშილობენ. ამ ეტაპზე, საქართველოს დაკავებული მოქალაქეები ჩვეულებრივ იღებენ საკვებს, არ საჭიროებენ სამედიცინო დახმარებას და არ აქვთ პრეტენზია წინასწარი დაკავების იზოლატორის ადმინისტრაციასთან“, - აცხადებენ საგარეო საქმეთა სამინისტროში.
საბერძნეთში 100-მდე ქართველი არალეგალი ბერძენმა სამართალდამცველებმა რამდენიმე დღის წინ დააკავეს. საქართველოს მოქალაქეები სხვადასხვა სამედიცინო დაწესებულებებიდან აიყვანეს. გამოძიება მათ არალეგალურ საქმიანობაში ადანაშაულებს.
დაკავებულების მიმართ წაყენებული მუხლი დეპორტაციას, ან რამდენიმე წლით თავისუფლების შეზღუდვას ითვალისწინებს. ამჟამად, წინასწარი დაკავების იზოლატორში საქართველოს 32 მოქალაქე რჩება. მათ პირადობის დამადასტურებელი მოწმობები არ აქვთ.
