ინტერნეტგამოცემა ,,პოლიტიკო“ ,,თავისუფალი დემოკრატების“ ლიდერის ირაკლი ალასანიას სტატიას აქვეყნებს სათაურით ,,დავიწყებული მოკავშირე“ . სტატიაში ოპოზიციის ლიდერი საქართველოში არსებულ პოლიტიკურ ვითარებას და მის პერსპექტივებს განიხილავს.
სტატია ავღანეთში დაღუპული 31-ე ქართველი სამხედროს გმირობის მაგალითით იწყება, გავლებულია პარალელები უკრაინასთან და გამოთქმულია გულისტკივილი, რომ საქართველოსა და უკრაინაში ნატოს დავიწყებულ მოკავშირედ აღქმა ლოგიკურად გაჩნდა.
”რიგითი ყულჯანიშვილი 31-ე ქართველი ჯარისკაცია, რომელიც საბრძოლო მოქმედებების დროს დაიღუპა იმ ათი წლის მანძილზე, რაც საქართველო ნებაყოფლობით გახდა ავღანეთში, ნატოს ხელმძღვანელობით ჩატარებული მოქმედებების ყველაზე დიდი კონტრიბუტორი ერთ სულ მოსახლეზე გათვლით (ამერიკის შეერთებული შტატების შემდეგ). საქართველო დღემდე არც ნატო-ს წევრია და არც ალიანსში გაწევრიანებისთვის საჭირო ზუსტი სამოქმედო გეგმა მიუღია. ალბათ გვეპატიება, თუ თავს დავიწყებულ მოკავშირედ ჩავთვლით”.
,,ჩვენი თავისუფლება, რომელიც ჩვენი სავიზიტო ბარათია, დაცული არ არის. უკვე მერამდენედ, ახალი ენერგიითა და იდეებით მოსულმა ხელისუფლებამ გადაუხვია გეზიდან და ავტორიტარულ გზას დაადგა ძალაუფლების შესანარჩუნებლად. სწორედ ამიტომ, კოალიციამ ,,ქართული ოცნება“, რომლის ნაწილი მაშინ ჩემი პარტიაც იყო, დაამარცხა ყოფილი პრეზიდენტის მიხეილ სააკაშვილის დესპოტური მთავრობა. სწორედ ამიტომ მოახერხა მანამდე სააკაშვილმა თავის გუნდთან ერთად, შევარდნაძის სწორი განზრახვების მქონე, მაგრამ კორუმპირებული მთავრობის ჩანაცვლება. დღეს ჩვენ შიგნიდან ვიღწვით დემოკრატიის გაძლიერებისა და შენარჩუნებისათვის. ჩვენ მოვითხოვთ მთავრობისგან იყოს ანგარიშვალდებული მის მიერ გაცემულ ისეთ დაპირებებზე, როგორიცაა სასამართლო სისტემის რეფორმა, საარჩევნო სისტემის მეტი წარმომადგენლობითობა და მედიის დაცვა ისეთი ცენზურისგან, როგორიც ახასიათებს ევრაზიის რეგიონს“.
,,თავისუფალი დემოკრატების“ ლიდერის აზრით, დღეს საქართველოს მართავს ხელისუფლება, რომელიც არაფერს აკეთებს ვითარების გასაუმჯობესებლად.
,,ახლანდელ ხელისუფლებაში თავი იჩინა იგივე ნეგატიურმა ტენდენციებმა, რამაც სააკაშვილის ადრეული პერიოდის მიღწევების ნიველირება მოახდინა. იხურება სატელევიზიო თოქ-შოუები, სისხლის სამართლის საქმეები პოლიტიზირებული, ხოლო სამართალი შერჩევითია. გარდა ამისა, მმართველმა კოალიციამ არაფერი გაკეთა საარჩევნო რეფორმის მიმართულებით, რომლის განხორციელების პირობა მან ჯერ კიდევ ოპოზიციაში ყოფნის დროს დადო“ - წერს ალასანია. ,,მხოლოდ ერთი ადამიანი წყვეტს და აკონტროლებს ყველაფერს. ერთ დროს ,,ქართული ოცნების“ პრემიერ-მინისტრი და დამფინანსებელი ბიძინა ივანიშვილი, ხშირად და იმპულსურად საუბრობს - ის დონალდ ტრამპის ქართულ ვარიანტს წააგავს. თუმცა, საქართველოში ივანიშვილი უფრო მძლავრი ფიგურაა, ვიდრე ტრამპი ამერიკაში. მათ, ვინც მორჩილია - აწინაურებენ, ხოლო ვინც არა - ათავისუფლებენ თანამდებობებიდან“.
წერილის დასასრულს ირაკლი ალასანია გამოთქვამს იმედს, რომ ქართველების ძალისხმევა და მისწრაფება ევროატლანტიკური სტრუქტურებისკენ, უკვალოდ არ ჩაივლის.
