მთავრობის ადმინისტრაციაში, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ გაცნობითი შეხვედრა გამართა საქართველოში გაეროს განვითარების პროგრამის (UNDP) დირექტორთან ნილ სკოტთან.
შეხვედრაზე მხარეებმა მიმოიხილეს UNDP-ს დახმარების ფარგლებში მიმდინარე აქტივობები. ასევე, ყურადღება გამახვილდა სამომავლო თანამშრომლობისა და გაეროს განვითარების პროგრამის მხრიდან საქართველოს ევროინტეგრაციის მიმართულებით სამომავლო მხარდაჭერის პერსპექტივებზე. ამავე კონტექსტში, მხარეებმა ასევე განიხილეს ევროპულ და ევრო-ატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატში ახლად შექმნილი სტრატეგიული კომუნიკაციის დეპარტამენტის შესაძლებლობების განვითარების სამომავლო ხელშეწყობის საკითხებიც.
„მნიშვნელოვანია, რომ ის დახმარებები, რაც ხორციელდება საერთაშორისო ორგანიზაციების მხრიდან, ერთმანეთს ხელს უწყობდეს და ავსებდეს იმ პროცესებში, რაც უკავშირდება, ერთის მხრივ, ასოცირების შეთანხმების შესრულებას, მეორეს მხრივ იმ რეფორმებს, რომელსაც საქართველოს მთავრობა ახორციელებს საჯარო ადმინისტრირების კუთხით, ასევე, სოფლის მეურნეობის საკითხებში. ჩვენთვის მნიშვნელოვანია, რომ ამ პროცესს თან ახლდეს სტრატეგიული კომუნიკაცია. ეს იყო ერთ-ერთი მთავარი თემა, რაც ჩვენ შეხვედრაზე განვიხილეთ“-აღნიშნა შეხვედრის დასრულების შემდეგ სახელმწიფო მინისტრმა.
