პარლამენტის თავმჯდომარე დავით უსუფაშვილი საქართველოში რუსული პროპაგანდის ზრდაზე საუბრობს და აცხადებს, რომ ეს მცდელობები იქნება უშედეგო.
როგორც მან ჟურნალისტებთან შეხვედრაზე განაცხადა, საქართველო არასოდეს გადაწყვეტს , რომ დაუბრუნდეს რუსეთთან უმცროსი ძმის სტატუსს.
,,პრაქტიკა აჩვენებს, რომ ვერ გავიხსენებთ როდესაც მსგავსი მოვლენები არ შეინიშნებოდა წინასაარჩევნოდ, არ იქნება სწორი ამ მოვლენების წაყრუება და ხელის აქნევა, მაგრამ არც ის იქნება სწორი რაიმე განსაკუთრებული ტრაგედია შევქმნათ ამისგან. მე ვერ ვხედავ იმის საშიშროებას, რომ ქართველმა ხალხმა ერთ მშვენიერ დღეს პროპაგანდის თუ სხვა რაიმე გავლენით გადაწყვიტყოს, რომ მზად ვართ დავუბრუნდეთ რუსეთთან უმცროსი ძმის სტატუსს და ეს იქნება ჩვენი ბედნიერების საწინადარი, ეს ასე ვერ იქნება. ხოლო რუსეთს სხვა ურთიერთობა, გარდა იმისა, რომ იყოს უკეთეს შემთხვევაში უფროსი ძმა არ შეუძლია", - განაცხადა დავით უსუფაშვილმა.
მისი თქმით, არიან პოლიტიკური ძალები, რომლებმაც შეიძლება საზოგადოების რაღაცა ნაწილის დარწმუნება საპირისპიროში შეძლონ, თუმცა არც ამისგან უნდა შევქმნათ ტრაგედია, რადგან მოსახლეობის 100% ერთ აზრზე ვერ იქნება.
უსუფაშვილი ხაზს უსვამს, რომ თუ ეს პროცესები დარჩება ჯანსაღი პოლიტიკური ცხოვრების ჩარჩოებში, ამისგან პრობლემა არ შეიქმნება, ხოლო თუ ვინმე სხვა გართულებებს მოინდომებს, ამაზე ადეკვატური რეაქცია იქნება.
პარლამენტის თავმჯდომარე დღეს ჟურნალისტების კითხვებს ერთ საათზე მეტხანს პასუხობდა და განაცხადა, რომ მსგავსი შეხვედრები უფრო ხშირად გაიმართება.
