პარლამენტის თავმჯდომარე დავით უსუფაშვილის განცხადებით, ისურვებდა, რომ უკრაინის ხელისუფლებას მისი მაღალჩინოსნების ქმედებებზე მეტი ყურადღება გაემახვილებინა, - ამის შესახებ მან დღეს გამართულ პრესკონფერენციაზე სააკაშვილის განცხადების კომენტირებისას აღნიშნა, რომლის თანახმადაც. საქართველოს პრეზიდენტმა ყოფილი მარალჩინოსნები უნდა შეიწყალოს.
„ვისურვებდი, რომ უკრაინის ხელისუფლებამაც ყურადღება მიაქციოს იმას, მისი მაღალჩინოსნები რა პოზიციებს აფიქსირებენ მეგობრული საქართველოს მიმართ. საქართველოს ხელისუფლებას, პარლამენტს პრიორიტეტებია უკრაინასთან სტრატეგიული თანამშრომლობის გაგრძელება და ასეთი გამოხტომები ამ ყველაფერს ხელს არ უწყობს, მაგრამ ვერც იმხელა საფრთხეს უქმნის, რომ ეს ანგარიშგასაწევი იყოს”, - განაცხადა უსუფაშვილმა.
მისი თქმით, შეწყალება პრეზიდენტის პრეროგატივაა და პასუხისმგებლობაც მას ეკისრება.
,,შეწყალების უფლებას თავისი წესი და რიგი აქვს. სხვათაშორის, ეს წესი და რიგი წინა პრეზიდენტის მიერ დაირღვა, როდესაც სასამართლო ინსტანციებში საქმის გასვლამდე შეწყალების აქტის გამოცემა გადაწყვიტა ერთ-ერთი იმ პირის მიმართ, რომელზეც დღეს საუბრობს. ეს იყო უფლებამოსილების გადამატება და მეტი არაფერი. დარწმუნებული ვარ, მარგველაშვილი პროცედურებში საქართველოს კონსტიტუციას დაიცავს, ხოლო პოლიტიკურ გადაწყვეტილებებში ქვეყნის სასიკეთო გადაწყვეტულებას მიიღებს იმ პრინციპებიდან გამომდინარე, რასაც შეწყალების აქტი უნდა ეფუძნებოდეს”,- აღნიშნა უსუფაშვილმა.
შეგახსენებთ, მიხეილ სააკაშვილმა განაცხადა, რომ საქართველოს პრეზიდენტი გიორგი მარგველაშვილი ისტორიაში სახელს დაიმკვიდრებს, თუკი გიგი უგულავა, ვანო მერაბიშვილი და ბაჩო ახალაია შეიწყალა.
