ნიდერლანდების სამეფოს ახლადდანიშნულმა ელჩმა იოჰანეს დაუმამ რწმუნებათა სიგელების ასლი გადასცა საქართველოს საგარეო საქმეთა მინისტრის მოადგილეს გიგი გიგიაძეს.
რწმუნებათა სიგელების ასლის გადაცემის შემდეგ, მინისტრის მოადგილეს და ელჩს შორის გაიმართა შეხვედრა. გიგი გიგიაძემ იოჰანეს დაუმას მიულოცა საქართველოში ელჩის თანამდებობაზე დანიშვნა, წარმატებები უსურვა მომავალ საქმიანობაში და ორ ქვეყანას შორის ურთიერთობების კიდევ უფრო გაღრმავების იმედი გამოთქვა. ამასთან, მინისტრის მოადგილემ მადლობა გადაუხადა ელჩს ნიდერლანდების მიერ საქართველოს სუვერენიტეტისა და ტერიტორიული მთლიანობის მტკიცე მხარდაჭერისთვის. შეხვედრაზე ხაზი გაესვა საქართველოსა და ნიდერლანდების სამეფოს შორის მთელ რიგ სფეროებში თანამშრომლობის კიდევ უფრო გაღრმავების სერიოზული პოტენციალის არსებობას.
თავის მხრივ, იოჰანეს დაუმამ კიდევ ერთხელ დაადასტურა ნიდერლანდების სამეფოს მხარდაჭერა საქართველოსადმი და გამოთქვა მზაობა, მაქსიმალურად ხელი შეუწყოს ორ ქვეყანას შორის ურთიერთობების გაღრმავებას და ახალ დონეზე აყვანას.
შეხვედრაზე ასევე განხილულ იქნა საქართველოში მიმდინარე მოვლენები, მაღალი და უმაღლესი დონის ორმხრივი შეხვედრები და ვიზიტები, ევროკავშირთან სავიზო რეჟიმის ლიბერალიზაციის მნიშვნელობა და ამ მიმართულებით მიღწეული წარმატებები, საქართველოს ევროპული და ევროატლანტიკური ინტეგრაცია და სამომავლო პერსპექტივები, საქართველოს ოკუპირებულ ტერიტორიებზე არსებული ვითარება და რეგიონში მიმდინარე მოვლენები.
