23 სექტემბერს ევროკავშირსა და საქართველოს შორის სავიზო რეჟიმის ლიბერალიზაციის სამოქმედო გეგმის იმპლემენტაციის საკითხებთან დაკავშირებით საგარეო საქმეთა მინისტრის მოადგილემ, გიგი გიგიაძემ შეხვედრა გამართა არასამთავრობო სექტორის წარმომადგენლებთან.
საქართველოს საგარეო საქმეთა სამინისტროში გამართულ შეხვედრას ასევე, ესწრებოდნენ სავიზო რეჟიმის ლიბერალიზაციის სამოქმედო გეგმის იმპლემენტაციის პროცესში ჩართული საქართველოს სხვადასხვა უწყებების წარმომადგენლები.
მინისტრის მოადგილემ შეხვედრის მონაწილეებს ინფორმაცია მიაწოდა იმ ქმედებებსა და გატარებული ღონისძიებების შესახებ, რომლებიც საქართველოს ხელისუფლებამ ევროკომისიის მე-3 ანგარიშის რეკომენდაციების გათვალისწინებით განახორციელა.
შეხვედრის დროს გიგი გიგიაძემ იმედი გამოთქვა, რომ საქართველოს მიერ მიღწეული პროგრესის გათვალისწინებით, ევროკავშირთან სავიზო რეჟიმის ლიბერალიზაციის პროცესი წარმატებით დასრულდება და წლის ბოლოს ევროკომისიის მიერ გამოქვეყნებული მე-4 ანგარიში საბოლოო იქნება.
შეხვედრაზე, ასევე ხაზი გაესვა, სავიზო რეჟიმის ლიბერალიზაციის პროცესში არასამთავრობო სექტორთან თანამშრომლობისა და მათი მაქსიმალური ჩართულობის მნიშვნელობას.
