„ერთიანი ნაციონალური მოძრაობის“ დეპუტატ ზურაბ მელიქიშვილის განცხადებით, ინფრასტრუქტურის მინისტრმა დღეს აღიარა, რომ ქვეყანაში მძიმე ეკონომიკური ვითარებაა, თუმცა ეს უშედეგო იქნება, თუ მთავრობის მხრიდან ამას რეაგირება არ მოჰყვება.
„დღეს საზოგადოებამ ინფრასტრუქტურის მინისტრ ნოდარ ჯავახიშვილისგან მოისმინა პირდაპირი და ძალზედ მძიმე აღიარება იმ მდგომარეობისა, რომლის შედეგებსაც საზოგადოების თითოეული წევრი საკუთარ თავზე გრძნობს. მან პირდაპირ აღიარა, რომ ეკონომიკა მძიმე მდგომარეობაშია, მაგრამ ეს შედეგის მომტანი არ იქნება, თუ მთავრობის მხრიდან რეაგირება არ მოჰყვება. მინისტრი საუბრობს, რომ თუ ლარი 2.54-ზე ავა, ამას ქვეყნის ეკონომიკა ვერ გაუძლებს, რომ სამინისტროში წლის ბოლოს ბიუჯეტის ათვისება ხდებოდა გაცემული ავანსების ხარჯზე და ის ამ მავნე პრაქტიკის გაგრძელებას აღარ აპირებს, მაგრამ ამავდროულად ხელისუფლების ფინანსური და ეკონომიკური სახედ კვლავ ნოდარ ხადური რჩება. აი ესაა პრობლემა. ხელისუფლებას არ გააჩნია გეგმა თუ როგორ უნდა დაიძლიოს ლარის გაუფასურება. სწორედ ამიტომ ვთავაზობთ ჩვენ მათ გადასახადების შემცირებას, იმ რეგულაციების გაუქმებას, რომელიც ბოლო 3 წლის განმავლობაში მიიღეს, საბიუჯეტო დეფიციტის შემცირების და ა.შ. თუ არ განხორციელდება აღნიშნული ნაბიჯები, მდგომარეობა მართლაც სავალალო იქნება“, - განაცხადა ზურაბ მელიქიშვილმა.
ლარის 2.54-იან კურსს დოლართან მიმართებაში ქართული ეკონომიკა და საზოგადოება ვერ გაუძლებს - ამის შესახებ განცხადებას საქართველოს რეგიონალური განვითარებისა და ინფრასტრუქტურის მინისტრი ,,კვირის პალიტრასთვის” მიცემულ ინტერვიუში აკეთებს.
”სამართლებრივად ქადაგიძე და ეროვნული ბანკი ლარის სტაბილურობაზე პასუხისმგებლები არ არიან და მეტიც, კონსტიტუციის თანახმად, დღეს ლარის სტაბილურობაზე პასუხისმგებელი არავინაა. ეს გაუგებარი ანომალიაა, მაგრამ რეალობა ასეთია და, სამწუხაროდ, დღემდე არც კანონმდებლობა შეცვლილა. ერთი რამის თქმა დარწმუნებით შემიძლია, 2.54-ს ქართული ეკონომიკა და საზოგადოება ვერ გაუძლებს. რამდენიმე თვის წინანდელი მონაცემებით, აღებული სესხების 64 პროცენტი დოლარში იყო, რაც იმას ნიშნავს, რომ მოსახლეობამ უარი უნდა თქვას გადახდაზე, ან გაყიდოს, თუ რამე აქვს დარჩენილი. თუ ასე გაგრძელდება, მღელვარების საშიშროება იქნება,“ - აცხადებს ნოდარ ჯავახიშვილი.
მინისტრმა განმარტება ეროვნული ბანკიდან ზედამხედველობის სამსახურის გამოყოფის შესახებაც გააკეთა. ჯავახიშვილი აცხადებს, რომ ზედამხედველობის სამსახურის ეროვნული ბანკისგან გამოყოფა არასწორი ნაბიჯია, თუმცა კონკრეტულ ვითარებაში სწორი გადაწყვეტილება იყო.
