საქართველოს პარლამენტის საგარეო ურთიერთობათა კომიტეტის თავმჯდომარე თედო ჯაფარიძე სამუშაო ვიზიტით პოლონეთს ეწვია.
ვიზიტის ფარგლებში, საგარეო ურთიერთობათა კომიტეტის თავმჯდომარე შეხვედრებს გამართავს პოლონეთის საკანონმდებლო და აღმასრულებელი ხელისუფლების წარმომადგენლებთან. თედო ჯაფარიძე აგრეთვე, მონაწილეობას მიიღებს მრგვალი მაგიდის დისკუსიაში თემაზე: „მიმდინარე საგარეო პოლიტიკის საკითხები“. ღონისძიება პოლონეთის საერთაშორისო საქმეთა ინსტიტუტის (PISM) ორგანიზებით გაიმართება, სადაც მონაწილეობას მიიღებენ ამავე ინსტიტუტის ექსპერტები.
ვიზიტის ფარგლებში დაგეგმილია შეხვედრები პოლონეთის რესპუბლიკის საგარეო საქმეთა მინისტრის მოადგილესთან, ლეშეკ სოჩევიცასთან, პოლონეთის რესპუბლიკის სეიმის საგარეო ურთიერთობათა კომიტეტის თავმჯდომარესთან, რობერტ ტიშკიევიჩთან და სენატის საგარეო ურთიერთობათა კომიტეტის თავმჯდომარესთა, ვლადიმირს ჩიმოსევიჩისთან.
თედო ჯაფარიძე შეხვედრებს გამართავს პოლონეთის პარლამენტის წევრთან, ნატო-ს საპარლამენტო ასამბლეის პოლონეთის დელეგაციის წარმომადგენელთან, ვიტოლდ ვაშიკოვსკისთან, ეუთო-ს დემოკრატიული ინსტიტუტებისა და ადამიანის უფლებათა დაცვის აპარატის დირექტორთან, მიხაელ გეორგ ლინკითან და პოლონურ-ამერიკული თავისუფლების ფონდის აღმასრულებელ პრეზიდენტთან, იეჟი კოზმინსკისთან.
საგარეო ურთიერთობათა კომიტეტის თავმჯდომარის, თედო ჯაფარიძის პოლონეთში ვიზიტი 24 სექტემბერს დასრულდება.
