ევროკავშირის წარმომადგენლობაში საკონსტიტუციო სასამართლოს გადაწყვეტილებას გიგი უგულავას სარჩელზე, ისტორიულ გადაწყვეტილებად აფასებენ. დღეს გამართულ პრესკონფერენციაზე საქართველოში ევროკავშირის წარმომადგენლობის ხელმძღვანელის მოადგილემ, კარლო ნატალემ განაცხადა, რომ არსებობდა სერიოზული კითხვები იმასთან დაკავშირებით, თუ როგორ მიმდინარეობდა ზოგადად ასეთი პროცესები.
"საკონსტიტუციო სასამართლოს გუშინწინდელი გადაწყვეტილება, ჩვენი აზრით, იყო საკვანძო, ისტორიული გადაწყვეტილება, რადგან მართლაც არსებობდა სერიოზული კითხვები იმასთან დაკავშირებით, თუ როგორ მიმდინარეობდა ზოგადად ასეთი პროცესები. ის, რომ ეს გადაწყვეტილება მიღებულ იქნა, მიანიშნებს, რომ სასამართლო საქართველოში მიჰყვება სათანადო პრინციპებს. ჩვენ ადრე გვქონდა გარკვეული კითხვები ამასთან დაკავშირებით და ამიტომაც ეს გადაწყვეტილება, ჩემი აზრით, არის დიდი მიღწევა", - განაცხადა კარლო ნატალემ.
მისი შეფასებით, საკონსტიტუციო სასამართლოს გადაწყვეტილების აღსრულება საკმაოდ მალე, 24 საათში მოხდა.
