საპარლამენტო უმრავლესობის ლიდერი დავით საგანელიძე საპარტნიორო ფონდის აღმასრულებელი მდივნის პოსტს დაიკავებს, - ამის შესახებ ინფორმაციას ოფიციალურად ამ დრომდე არ ადასტურებენ, თუმცა დღეს საპარლამენტო უმრავლესობის წევრმა, თამაზ მეჭიაურმა ჟურნალისტებთან განაცხადა, რომ საკითხზე გადაწყვეტილება თავად - საგანელიძემ უნდა მიიღოს.
საფინანსო-საბიუჯეტო კომიტეტის თავმჯდომარე აცხადებს, რომ პირადად მისი სურვილია, საგანელიძე უმრავლესობიდან არ წავიდეს.
რაც შეეხება ირაკლი კოვზანაძეს, იგი ზედამხედველობის სააგენტოს საბჭოს წევრობის კანდიდატად, 7 წლის ვადით არის წარდგენილი.
შეგახსენებთ, პარლამენტში საფინანსო-საბიუჯეტო კომიტეტის სხდომა მიმდინარეობს, სადაც ზედამხედველობის სააგენტოს საბჭოს წევრობის კანდიდატებს უსმენენ.
საბჭოს წევრად 5 წლის ვადით არჩევის მიზნით წარდგენილია ეფრემ ურუმაშვილის კანდიდატურა, ხოლო 7 წლის ვადით არჩევის მიზნით - ეკატერინე გალდავას, ირაკლი კოვზანაძისა და საშა ტერნესის კანდიდატურები.
"ეროვნული ბანკის შესახებ" კანონში განხორციელებული ცვლილებების მიხედვით, სააგენტოს საბჭოს 7 წევრიდან 5-ს მთავრობის წარდგინებით ირჩევს საქართველოს პარლამენტი 7 წლის ვადით - სიითი შემადგენლობის უმრავლესობით.
