,,თავდაცვის ყოფილი მინისტრი” ირაკლი ალასანია პარლამენტის თავდაცვისა და უშიშროების კომიტეტის თავმჯდომარეს რამდენიმე კითხვით მიმართავს. კერძოდ, იცოდა თუ არა სესიაშვილმა, რომ ოპტიკურბოჭკოვანი მაგისტრალის პროექტით თავდაცვის სამინისტროს კომუნიკაცია რუსეთის ფედერაციის სპეცსამსახურების ხელში ჩაეგდოთ. ასევე ალასანია დაინტერესდა ფლობდა თუ არა დეპუტატი ინფორმაციას ,,სპეცკავშირმშენის" გენერალური დირექტორის, ავთანდილ ჭოლოკავას ნასამართლეობის შესახებ.
,, მაინტერესებს იცოდა თუ არა ირაკლი სესიაშვილმა, რომ ამ პროექტს შეეძლო თავდაცვის სამინისტროს კომუნიკაცია რუსეთის ფედერაციის სპეცსამსახურების ხელში ჩაეგდო. ასევე მაინტერესებს სესიაშვილის შეფასება იმ ფაქტთან დაკავშირებით, რომ პოლიტიკურად მოტივირებული საქმის მიმდინარეობის გამო შეჩერებულია ოპტიკურბოჭკოვანი ხაზების სხვა პროექტი და თითოეული დღე ჩვენი ქვეყნის თავდაცვისუნარიანობას აფერხებს. ამ პროექტს, რომელიც მზადდებოდა, არ იბარებს თავდაცვის სამინისტრო, რადგან პროკურატურისგან არის ზეწოლა. მინდა სესიაშვილის მხრიდან მოვისმინო შეფასება", - განაცხადა ირაკლი ალასანიამ.
10 სექტემბერს, ე.წ. კაბელების საქმეზე პროკურატურის მოწმე შპს ,,სპეცკავშირმშენის" გენერალური დირექტორი, ავთანდილ ჭოლოკავა დაიკითხა.
დაცვის მხარის განმარტებით, თავის დროზე მიხეილ გორბაჩოვის აგარაკი უზრუნველყო ოპტიკურ-ბოჭკოვანი კაბელით და ეს მომსახურება კგბ- მეცხრე სამმართველომ ჩაიბარა.
ჭოლოკავამ, სასამართლოს მოუთხრო თუ როგორ სთავაზობდა თავდაცვის სამინისტროს ოპტიკურ-ბოჭკოვანი მაგისტრალით მომსახურებას უფასოდ, მიუხედავად იმისა, რომ ეს მაგისტრალი თავად მის კომპანიას 80-100 მილიონი უჯდებოდა და ამ თანხას ინვესტორისგან ელოდებოდა. თუმცა ჭოლოკავამ ვერ დაასახელა კონკრეტული ინვესტორი.
ჭოლოკავამ პროცესზე განაცხადა, რომ მან თავის დროზე თავდაცვის სამინისტროს ამ მაგისტრალში რამდენიმე წვერის გამოყენება შესთავაზა.
ასევე დაკითხვისას გაირკვა, რომ მოწმეს ოფიცალურად არ მიუმართავს წერილობით სამინისტროსთვის. თუმცა განაცხადა, რომ თავდაცვის მინისტრთან შეხვედრაში პარლამენტის თავდაცვისა და უშიშროების კომიტეტის თავმჯდიმარე ირაკლი სესიაშვილი დაეხმარა.
