ბრაზილიაში საქართველოს საგანგებო და სრულუფლებიანმა ელჩმა ოთარ ბერძენიშვილმა რწმუნებათა სიგელები გადასცა ტრინიდადი და ტობაგოს რესპუბლიკის პრეზიდენტს - შეიარაღებული ძალების უმაღლეს მთავარსარდალს მის აღმატებულებას ბატონ ენტონი ტომას აკინას კარმონას.
პრეზიდენტთან შეხვედრაზე განხილულ იქნა ორ ქვეყანას შორის ურთიერთობების გაღმავების პერსპექტივები პოლიტიკურ, ეკონომიკურ, განათლების, კულტურის, ტურიზმისა და სოფლის მეურნეობის სფეროებში, ასევე ყურადღება გამახვილდა საერთაშორისო და რეგიონალურ ორგანიზაციებში თანამშრომლობის განმტკიცების საკითხებზე, ხაზი გაესვა ქვეყნებს შორის მაღალი დონის ვიზიტების გაცვლის აუცილებლობას და ხალხთაშორისი კავშირების გამყარებას.
საგარეო უწყების ცნობით, ენტონი კარმონამ ოთარ ბერძენიშვილს, როგორც საქართველოს პირველ ელჩს წარმატებები უსურვა მის მომავალ საქმიანობაში და აღნიშნა, რომ ტრინიდადი და ტობაგოს რესპუბლიკამ ხსენებული აკრედიტაციით კიდევ ერთი მეგობარი ქვეყანა შეიძინა ევროპიდან.
ქ. პორტ-ოვ-სპეინში ოფიციალური ვიზიტის ფარგლებში ოთარ ბერძენიშვილმა შეხვედრები გამართა საგარეო საქმეთა და კარიბის ქვეყნების გაერთიანების საკითხებში მუდმივ მდივანთან ქალბატონ ფრანსის სიგნორეტთან და ამავე სამინისტროს ევროპული და მრავალმხრივი ურთიერთობების დეპარტამენტის დირექტორთან.
