პარლამენტში ხვალ, ღია მმართველობის პარტნიორობის (OGP) ფარგლებში, კონფერენცია "ღიაობის ვალდებულება: პარლამენტის სამოქმედო გეგმები, სტანდარტები და მეთოდები" გაიხსნება.
ორდღიან კონფერენციას პარლამენტის თავმჯდომარე დავით უსუფაშვილი და იუსტიციის მინისტრი თეა წულუკიანი გახსნიან. სიტყვით გამოვლენ სამხრეთ აფრიკის საჯარო სამსახურისა და ადმინისტრაციის მინისტრის მოადგილე, ღია მმართველობის პარტნიორობის მმართველი კომიტეტის თანათავმჯდომარე აიანდა დლოდლო, ალბანეთის პარლამენტის თავმჯდომარე ილირ მეტა, ჩილელი კონგრესმენი გუიერმო სერონი ფუენტესი, "ეროვნულ-დემოკრატიული ინსტიტუტი-საქართველოს" (NDI) ხელმძღვანელი ლორა თორნტონი და გაეროს განვითარების პროგრამის (UNDP) მუდმივი წარმომადგენელი საქართველოში ნილს სკოტი.
ხვალინდელ კონფერენციაზე საუბრის მთავარი თემა საკანონმდებლო ღიაობა, ციფრული ტექნოლოგიები და დემოკრატია იქნება. პარლამენტის მიერ გავრცელებული ინფორმაციით, მომხსენებლები განიხილავენ, თუ როგორ ცვლის ახალი ტექნოლოგიები დემოკრატიას და საკანონმდებლო ორგანოების მუშაობას. განსაკუთრებულ აქცენტებს ისინი შესაძლებლობებზე, გამოწვევებსა და მიღწეულ წარმატებაზე გააკეთებენ.
შეხვედრის მონაწილეები წარმოადგენენ სიახლეებს მათ ქვეყნებში საპარლამენტო ღიაობის ამჟამინდელი მდგომარეობის შესახებ.
მომხსენებლები განიხილავენ საპარლამენტო ღიაობის გაძლიერების სტრატეგიებს, მათ შორის საპარლამენტო ღიაობის დეკლარაციის მიღებისა და საპარლამენტო ღიაობის სამოქმედო გეგმების შემუშავების პროცესებს. მომხსენებლები, ასევე, ისაუბრებენ როლზე, რომელსაც საპარლამენტო ღიაობის გაძლიერებისთვის არასამთავრობო სექტორი ასრულებს.
გარდა ამისა, დიკუსია გაიმართება შემდეგ თემაზე: საპარლამენტო ეთიკის საერთაშორისო სტანდარტების შემუშავება, საკანონმდებლო ღიაობის ინსტრუმენტები, საპარლამენტო ღიაობის ეფექტური სამოქმედო გეგმების შემუშავება, ჩართულობის სამომავლო შესაძლებლობები და ღია მმართველობის პარტნიორობის სამიტის საკანონმდებლო კომპონენტის მიმოხილვა.
კონფერენცია 09:30 საათზე გაიხსნება.
