პარლამენტის თავმჯდომარის, დავით უსუფაშვილის განცხადებით, პარლამენტი ენისთვის შესაძლოა სერიოზული ზიანის მომტანი აღმოჩნდეს. საკანონმდებლო ორგანოში მიმდინარე კონფერენციაზე -"ენა და თანამედროვე ტექნოლოგიები" უსუფაშვილმა აღნიშნა, რომ საქართველოს საკანონმდებლო დოკუმენტებში ენობრივი თვალსაზრისით ბევრი ხარვეზია.
,,როდესაც ჩვენს პროდუქტს - საქართველოს კანონმდებლობას კითხულობთ და იქ ძალიან ბევრ ხარვეზს ნახულობთ ენობრივი თვალსაზრისით: გრამატიკა, სტილი, ტერმინოლოგია და ძალიან ბევრი რამ. მინდა გითხრათ, რომ ჩვენ ამაზე ვწუხვართ და ვიცით, რომ პარლამენტი ამ თვალსაზრისით შესაძლოა ძალიან სერიოზული ზიანის მომტანი იყოს ენისთვის, თუ ეს საქმე არ გამოვასწორეთ. ჩვენს მიერ კანონში არასწორად ჩაწერილი ფრაზა, ტერმინი თუ სხვა ენობრივი ნიუანსები, არ არის უბრალოდ ენის მორიგი დამახინჯება, რომელიც შეიძლება თუნდაც ჟურნალისტის, მწერლის, პოეტის,გამონათქვამში ერთხელ მოხვდეს და ის მერე მარტივად წავა - სხვა მწერალი სხვაგვარად იტყვის, სხვა ჟურნალისტი სხვაგვარად და გამოსწორებადია. კანონში არასწორად ჩაწერილი ტერმინი გამოსწორებადი არ არის, რადგან ის უკვე კანონია. მერე ყველა - მოქალაქე, მოსამართლე, პროკურორი ვალდებულია ასე წაიკითხოს, ასე გამოიყენოს, ასე იმეტყველოს. სხვა შემთხვევაში ის კანონს არღვევს, იმიტომ რომ კანონმა ასე დაადგინა”, _აღნიშნა უსუფაშვილმა.
კონფერენციაში - "ენა და თანამედროვე ტექნოლოგიები" ქართველი და უცხოელი ენათმეცნიერები იღებენ მონაწილეობას. კონფერენცია15 სექტემბრამდე გაგრძელდება.
