პარლამენტის თავმჯდომარის დავით უსუფაშვილის განცხადებით, ქართული ენის მოვლა-პატრონობა უმთავრესი სახელმწიფოებრივი საკითხია. უსუფაშვილი ამ მიმართულებით, მეცნიერებს ყოველგვარ ხელშეწყობას სთავაზობს.
„ვისაუბროთ ქართული ენის, თუ ზოგადად ენის მნიშვნელობაზე, მე მგონი ეს ცოტა უხერხულიც კი არის ამ აუდიტორიის წინაშე, მაგრამ მე მინდა თქვენი ყურადღება გავამახვილო ენის ერთ ძალიან მნიშვნელოვან ესპექტზე - ენა გარდა კომუნიკაციის საშუალებისა, გარდა უმთავრესი ეროვნული, კულტურული ფასეულობისა და ღირებულებისა, ენა არის კიდევ სახელმწიფო ენა, საქართველოს კონსტიტუციით გამოცხადებული სტატუსი. ეს ორ რამეს ნიშნავს. პირველ რიგში იმას, რომ მას სჭირდება განსაკუთრებული სახელმწიფო მზრუნველობა და მეორე ის, რომ მას აქვს განსაკუთრებული სახელმწიფოებრივი დატვირთვა. სახელმწიფო ეს არის გარკვეულ ტერიტორიაზე დასახლებული მოქალაქეების ერთობა, რომელებსაც ერთმანეთის ესმით, რომლებიც ერთმანეთთან კომუნიკაციაში არიან და სწორედ სახელმწიფო ენა არის ამისი უმთავრესი საშუალება. დღევანდელი ქართული სახელმწიფო, რომელიც ამ პარამეტრების თვალსაზრისით სერიოზულად ნაკლული სახელმწიფოა ჯერ კიდევ, ვინაიდან ჩვენ ტერიტორიული მთლიანობის პრობლემა გვაქვს გადასაწყვეტი, ანუ სახელმწიფოებრიობის ერთ-ერთი უმთავრესი და სერიოზული თემა. ჩვენი სახელმწიფო ნაკლულია იმითაც, რომ ჩვენი მოქალაქეების პრობლემებიც გვაქვს ჩვენ გადასაწყვეტი“, - განაცხადა დავით უსუფაშვილმა პარლამენტში ქართულ ენასთან დაკავშირებით მიმდინარე კონფერენციაზე.
მისი ინფორმაციით, პარლამენტში, ორი კვირაში, გაიმართება სამუშაო შეხვედრა, სადაც ფართო სამსჯავროზე იქნება გამოტანილი - მიგრაციული პროცესები საქართველოში და მისი გამოწვევები.
,,საკითხები, თუ როგორ უნდა შევინარჩუნოთ ჩვენი მოქალაქეები არა მხოლოდ საქართველოში, არამედ უცხოეთშიც, როგორც უნდა გვქონდეს მათთან სახელმწიფოებრივი ურთიერთობა და ასე შემდეგ. ცხადია, ქართული ენა და ქართული ენის მოვლა-პატრონობა ამ რიგში განსახილველი უმთავრესი სახელმწიფოებრივი საკითხია. ამიტომ გავკადნიერდით და პატივცემულ მეცნიერებს შევთავაზეთ არა მხოლოდ პარლამენტის შენობა და დარბაზი, არამედ ის სტატუსი და შესაძლებლობები რაც პარლამენტს გააჩნია, როგორც საკანონმდებლო თვალსაზრისით, ისე სხვა რესურსების თვალსაზრისით“, - აღნიშნა პარლამენტის სპიკერმა.
