საზოგადოებრივი მაუწყებლის ჟურნალისტი ეკა მიშველაძე და საპარლამენტო უმრავლესობის დეპუტატი, თავდაცვისა და უშიშროების კომიტეტის თავმჯდომარე ირაკლის სესიაშვილი შეხვედრაზე შეთანხმდნენ. ამის შესახებ, სესიაშვილმა ,,ჯი-ეიჩ-ენთან” საუბარში განაცხადა.
,,დღეს დილით ვესაუბრე ეკას და შევთანხმდით შეხვედრაზე. რა თქმა უნდა ეს იქნება არაფორმალური შეხვედრა. მეტს დეტალს ჯერ ვერ მოგახსენებთ”, -განუცხადა „ჯი-ეიჩ-ენს“ სესიაშვილმა.
კითხვაზე, როდისთვის დაიგეგმა შეხვედრა, დეპუტატი აცხადებს:
,,ჩვენ შევთანხმდით, რომ ეკას ზარს დაველოდები“', -აცხადებს სესიაშვილი.
”სანამ ყველა გაიგებდა, სპეცსამსახურებმა იცოდნენ ჩემი და ალექსი პერტიაშვილის ურთიერთობის შესახებ,” - ეს სკანდალური განცხადება ,,რუსთავი-2”-ის პირდაპირ ეთერში ტელეწამყვანმა ეკა მიშველაძემ გააკეთა.
,,არჩევანში” მიშველაძეს თემაზე დეტალურად არ უსაუბრია და მხოლოდ მცირე კომენტარით შემოიფარგლა.
”მანამდე, ვიდრე საზოგადოებრივი მაუწყებლის მრჩეველი გაიგებდა, რომ მე და ალექსი პეტრიაშვილი დავქორწინდით, ამის შესახებ იზრუნეს და შესაბამისმა სამსახურებმა იცოდნენ ჩემსა და ალექსი პეტრიაშვილს შორის არსებული ურთიერთობის შესახებ. ამაზე მეტს არაფერს ვიტყვი. გასაგებად ვთქვი, რაც ვთქვი,” - განაცხადა ეკა მიშველაძემ.
მოგვიანებით, გადაცემაში თავდაცვისა და უშიშროების კომიტეტის თავმჯდომარე, ირაკლი სესიაშვილი ჩაერთო, სადაც პირობა დადო, რომ ამ საკითხით აუცილებლად დაინტერესდება.
"ეს ინფორმაცია ჩემთვის ყურადსაღები იყო და მზად ვარ, პირადად შევხვდე ეკა მიშველაძეს და დავინტერესდე. ამ განცხადებას მივყვები აუცილებლად. მას შეეძლო, არამარტო ჩემთვის, არამედ სამართალდამცავებისთვისაც მიემართა და დარწმუნებული ვარ, ადეკვატური რეაგირება მოჰყვებოდა ამას," - განაცხადა ირაკლი სესიაშვილმა.
