საგარეო უწყების ხელმძღვანელის გიორგი კვირიკაშვილის განცხადებით, ქართულმა მხარემ ჩინელ პარტნიორებს უნდა დაუსაბუთოს, რომ საქართველო და სამხრეთ კავკასია შესაძლოა იყოს ერთ-ერთი ყველაზე კონკურენტუნარიანი დროისა და დანახარჯების თვალსაზრისით.
მისივე თქმით, პრემიერი ირაკლი ღარიბაშვილი ვიზიტის ფარგლებში აქცენტს გაკეთებს საქართველოს სატრანზიტო უპირატესობაზე.
,,პრემიერ-მინისტრის გააკეთებს აქცენტს ჩვენი სატრანზიტო კორიდორის კონკურენტუნარიანობის ასპექტებზე. ძალიან მნიშვნელოვანია აღნიშნოს, რომ სამხრეთ კავკასიის კორიდორი არის ერთ-ერთი ყველაზე კონკურენტუნარიანი იმ სხვა ალტერნატიულ მარშუტებთან მიმართებაში რომელიც უკვე არსებობს. ეს არის სხავადასხვა მიმართულებები, მათ შორის რუსეთის გავლით, ოკეანის გავლით. ამიტომ ჩვენ უნდა დავუსაბუთოთ ჩვენს ჩინელ პარტნიორებს, რომ საქართველო და სამხრეთ კავკასია შესაძლოა იყოს ერთ-ერთი ყველაზე კონკურენტუნარიანი დროის კუთხით, ასევე დანახარჯების კუთხით”, _განაცხადა ჩინეთში ვიზიტის ფარგლებში კვირიკაშვილმა.
საქართველოს დელეგაცია, რომელსაც პრემიერ-მინისტრი ირაკლი ღარიბაშვილი ხელმძღვანელობს, სამუშაო ვიზიტით ჩინეთის სახალხო რესპუბლიკას ეწვია.
ვიზიტის ფარგლებში ირაკლი ღარიბაშვილი მაღალი რანგის ორმხრივ შეხვედრებს გამართავს და მონაწილეობას მიიღებს ქალაქ დალიანში მსოფლიო ეკონომიკურ ფორუმში. პრემიერ-მინისტრი სიტყვით გამოვა სესიაზე - "თანამედროვე აბრეშუმის გზა" (“The Modern Silk Road”).
საქართველოს დელეგაციის შემადგენლობაში იმყოფებიან:ვიცე-პრემიერი, საქართველოს საგარეო საქმეთა მინისტრი გიორგი კვირიკაშვილი, საქართველოს პარლამენტის უმრავლესობის ლიდერი დავით საგანელიძე,საქართველოს ეკონომიკისა და მდგრადი განვითარების მინისტრი დიმიტრი ქუმსიშვილი, აჭარის ავტონომიური რესპუბლიკის მთავრობის თავმჯდომარე არჩილ ხაბაძე, საქართველოს პარლამენტის წევრი გუბაზ სანიკიძე, საქართველოს ეროვნული საინვესტიციო სააგენტოს დირექტორი გიორგი პერტაია, თანაინვესტირების ფონდის თავმჯდომარე გიორგი ბაჩიაშვილი, საქართველოს რკინიგზის გენერალური დირექტორი მამუკა ბახტაძე.
