საგარეო ურთიერთობათა კომიტეტის თავმჯდომარემ, თედო ჯაფარიძემ ლატვიის საგარეო საქმეთა მინისტრის მოადგილე ანდრეი პილდეგოვიჩი მიიღო. როგორც თედო ჯაფარიძემ აღნიშნა, შეხვედრა სტუმრის თხოვნით გაიმართა, სადაც მხარეებმა ორ ქვეყანას შორის არსებულ ურთიერთობებსა და ამ ურთიერთობების კიდევ უფრო გაღრმავების გზებზე, ევროპულ და ევროატლანტიკურ სტრუქტურებში საქართველოს ინტეგრაციის პროცესებზე და რეგიონის უსაფრთხოების საკითხებზე ისაუბრეს. მხარეებმა გეოპოლიტიკური ვითარება და რეგიონული პრობლემებიც მიმოიხილეს.
„განვიხილეთ ის კომპლექსური დღის წესრიგი, რომელიც ჩვენი ქვეყნის წინაშე დგას ნატოში და ევროკავშირში გაწევრიანების თვალსაზრისით. ასევე ვისაუბრეთ, თუ როგორ და რა სახის დახმარება შეიძლება ლატვიამ და ზოგადად, ბალტიის ქვეყნებმა გაუწიონ საქართველოს ევროპულ სტრუქტურებთან ინტეგრაციის გზაზე“, - განაცხადა შეხვედრის დასრულების შემდეგ საგარეო ურთიერთობათა კომიტეტის თავმჯდომარემ.
მხარეებმა საქართველოს ოკუპირებულ ტერიტორიაზე არსებული ვითარება და ზოგადად, ჩვენი ქვეყნის რუსეთთან ურთიერთობა განიხილეს.
რეგიონში არსებული ვითარების მიმოხილვისას, შეხვედრაზე ყურადღება საქართველოს აზერბაიჯანთან და სომხეთთან არსებულ ურთიერთობებზეც გამახვილდა.
