ზოგი ეჭვის თვალით უყურებს ნატო-ში გაწევრიანებას, მაგრამ ეს ეჭვები თქვენ უნდა გააქარწყლოთ, - ასე მიმართა ლიტვის საგარეო საქმეთა მინისტრმა ლინას ლინკევიჩიუსმა საქართველოს ხელისუფლებას სასტუმრო "რუმსში" მიმდინარე კონფერენციაზე სიტყვით გამოსვლისას.
მისივე თქმით, საჭიროა ხელისუფლებამ შეწყვიტოთ წუწუნი და გააგრძელოთ ბრძოლა.
"საქართველოს შეუძლია, ნატო-ს წევრი გახდეს. უბრალოდ, საჭიროა, მეტი ინფორმაცია მიაწოდოთ ხალხს ევროკავშირისა და ნატო-ს შესახებ. ჩვენ თქვენ გვჭირდებით ევროპულ ოჯახში. ჩვენ კვარგად გვესმის საქართველოსი. მჯერა, საქართველო ისწავლის ჩვენი მაგალითებიდან. მოგიწოდებთ, შეწყვიტოთ წუწუნი და გააგრძელოთ ბრძოლა. თქვენ უკვე გაქვთ ნატო-ს საწვრთნელი ცენტრი და ყველა ბერკეტი და დაპირება. მთავარია მუშაობა. მართალია ამბობენ, რომ ზოგი ეჭვის თვალით უყურებს ნატო-ში გაწევრიანებას, მაგრამ ეს ეჭვები თქვენ უნდა გააქარწყლოთ", - განაცხადა ლინკევიჩიუსმა.
მისივე თქმით, ოპოზიციისა და ხელისუფლების ბრძოლაში ბევრი დრო იკარგება, რაც არცთუ ისე კარგი მესიჯია.
"არ არის აუცილებელი, ოპოზიციის წარმომადგენლები ციხეში გამოკეტოთ, შეგიძლიათ, უფრო დამაჯერებლად და ნაკლებად მტკივნეულად იმუშაოთ", - განაცხადა ლინკევიჩიუსმა და დასძინა, რომ საქართველო რუსეთის პროვოკაციებს არ უნდა წამოეგოს.
