დედაქალაქის მიწათსარგებლობის გენერალური გეგმის შემუშავება-განახლების პროცესში ჩაერთო საერთაშორისო საკონსულტაციო კომპანია PWC (PricewaterhouseCoopers), რომელიც მსოფლიოს მასშტაბით 1000 დარგობრივი სპეციალისტით არის წარმოდგენილი და რომელსაც 20 ქალაქის, მათ შორის, ლიონისა და ნიუ ორლეანის გენერალური გეგმების შემუშავებაში აქვს მიღებული მონაწილეობა. ამასთან, ამ დროისთვის PWC ბერლინის ქალაქგეგმარების პროექტზე მუშაობს.
დღეს, სასტუმრო „ქორთიარდ მარიოტში“ თბილისის მერმა, დავით ნარმანიამ და PWC-ს წარმომადგენელმა, რაჰულ გუფთამ სამომავლო თანამშრომლობის საკითხებთან დაკავშირებით პრესკონფერენცია გამართეს.
როგორც ცნობილია, თბილისის არქიტექტურის სამსახურმა გრძელვადიან პერიოდში დედაქალაქის სივრცითი განვითარების უზრუნველსაყოფად, სტრატეგიულ ხედვისა და პრიორიტეტების განხორციელების გზების განსაზღვრის მიზნით, დედაქალაქის მიწათსარგებლობის გენერალური გეგმის განახლების კონკურსი გამოაცხადა.
PWC მონაწილეობას მიიღებს საკონკურსო კომისიის სხდომებში, დაესწრება პრეზენტაციების განხილვებს, ჩაერთვება გამარჯვებულის გამოვლენის პროცესში.
თბილისის მერის დავით ნარმანიას განცხადებით, გენერალური გეგმის შემუშავება ერთ-ერთი მნიშვნელოვანი ამოცანაა და დედაქალაქის გრძელვადიანი სტრატეგიული სივრცითი განვითარება სწორედ გენერალური გეგმით მიიღწევა.
„მას შემდეგ, რაც გამარჯვებული გამოვლინდება, ისინი დაგვეხმარებიან კონტრაქტის მომზადებაში, ისევე როგორც კონკურსში გამარჯვებულ კომპანიას და დედაქალაქის არქიტექტურის სამსახურს დაეხმარება გეგმარებითი დავალებების სრულყოფაში, რაც მნიშვნელოვანი პროცესია და შემადგენილი ნაწილია ჩვენს მიერ გამოცხადებული კონკურსისა. ჩვენ ამ ორი დღის განმავლობაში ყველა კონკურსანტს მოვუსმენთ, ვნახავთ მათ მიერ წარმოდგენილ საკონკურსო განაცხადებს. აქ არის წარმოდგენილი კვალიფიციური ჟიური- საკონკურსო კომისია, რომელიც სხვადასხვა უწყებების წარმომმადგენლებისგან, სპეციალისტებისგან და პროფესიული წრეებისგან არის დაკომპლექტებული“,- განაცხადა დავით ნარმანიამ.
ამასთან, ქალაქ თბილისის მუნიციპალიტეტის არქიტექტურის სამსახური PWC-სთან ერთად შეიმუშავებს გამარჯვებულ ჯგუფთან დასადები კონტრაქტის ფორმას. PricewaterhouseCoopers-ი გეგმარებითი დავალების სრულყოფაში დახმარებას გაუწევს როგორც გამარჯვებულ კონკურსანტებს, ისე, არქიტექტურის სამსახურს.
„ვიმედოვნებთ, რომ წარმოდგენილი განაცხადები ძალიან კარგი იქნება. დიდი მადლობა მინდა გადავუხადო PWC -s, რომელიც იქნება ჩვენი ძირითადი პარტნიორი შეფასების, დაზუსტების, ძირითადი დავალების მომზადებისა და შემდგომ უკვე კონტრაქტის მომზადების ნაწილში, რაც ძალიან მნიშვნელოვანია ჩვენთვის, ვინაიდან ეს არის კომპანია, რომელსაც, აქვს უდიდესი გამოცდილება აღნიშნული მიმართულებით“,- განაცხადა თბილისის ვიცე-მერმა დიმიტრი ქუმსიშვილმა.
როგორც PWC-ს წარმომადგენელმა, რაჰულ გუფთამ განაცხადა, ქალაქ თბილისის მთავრობამ გადაწყვიტა ლოგიკურად და სისტემურად მიუდგეს საკითხს, რაშიც მათ საერთაშორისო საკონსულტაციო კომპანია PricewaterhouseCoopers (PWC) დაეხმარება.
„გამოყენებული იქნება გამოცდილება, რომელსაც გლობალურად ვიყენებთ, ამერიკაში, ევროპაში და ახლო აღმოსავლეთში. ჩვენ ვართ იმ გლობალური ქსელის ნაწილი, რომელიც წარმოდგენილი 160 ქვეყანაში. ჩვენ ვმუშაობთ, როგორც მცირე, ასევე დიდ ბიზნესთან, როგორც ადგილობრივ, ასევე საერთაშორისო დონეზე. ვიყენებთ არსებულ ტექნოლგიებს, ინფორმაციას, კომუნიკაციას, მსხვილ პროეტებსა და ინფრასტრუქტურულ პროეტებს რათა, დავეხმაროთ ქალაქ თბილისს მისი მიზნების მიღწევაში“,- განაცხდა რაჰულ გუფთამ.
პრესკონფერენციის დასრულებისთანავე გაიმართა კონკურსანტთა პროექტების პრეზენტაციები, რომლებიც შემდგომ საჯარო და ქალაქ თბილისის მერიის არქიტექტურის სამსახურის ვებ-გვერდზე - www.tas.ge აიტვირთება.
19 მაისს გამოაცხადებულ კონკურსში მონაწილეობის მიღება შეეძლო ყველა დაინტერესებულ ფიზიკურ და იურიდიულ პირს როგორც საქართველოს, ისე, სხვა ქვეყნის მოქალაქესა და ორგანიზაციას, იურიდიულ პირთა გაერთიანებას ან საერთაშორისო ორგანიზაციას, რომელიც აკმაყოფილებდა საკონკურსო პირობებით განსაზღვრულ მოთხოვნებს.
საკონკურსო წინადადებების მიღება 2015 წლის 01 აგვისტოს დასრულდა. ამის შემდეგ კომისიის ყველა წევრს, განსახილვევლად დაეგზავნა შემოსული თერთმეტივე საკონკურსო წინადადება.
კომისიის წევრები არიან ქალაქ თბილისის მერი დავით ნარმანია, ვიცე-მერი დიმიტრი ქუმსიშვილი, მერიის არქიტექტურის სამსახურის ხელმძღვანელობა, სხვადასხვა სამსახურის უფროსები ასევე თბილისის მუნიციპალიტეტის საკრებულოს წევრები, კულტურისა და ძეგლთა დაცვის სამინისტროს, ეკონომიკისა და მდგრადი განვითარების სამინისტროს, არქიტექტორთა კავშირის, სახელმწიფო სამხატვრო აკადემიის, საქართველოს ტექნიკური უნივერსიტეტის და საქართველოს არქიტექტორთა ასოციაციის წარმომადგენლები.
საკონკურსო კომისია უფლებამოსილია, წარმოდგენილი საკონკურსო წინადადებების შეფასების შედეგად გამოავლინოს 3 (სამი) გამარჯვებული.
წინასაპროექტო მოსაზრების (ხედვის) შესყიდვის ღირებულება საქართველოს კანონმდებლობით გათვალისწინებული გადასახადების ჩათვლით შეადგენს: I ადგილისათვის - 50 000 ლარს, II ადგილისათვის - 30 000 ლარს, III ადგილისათვის - 20 000 ლარს.
გამარჯვებულ კონკურსანტთან, რომელსაც მიენიჭება I ადგილი, დედაქალაქის მიწათსარგებლობის გენერალური გეგმის დამუშავების მიზნით, გაფორმდება სახელმწიფო შესყიდვის შესახებ ხელშეკრულება.
დედაქალაქის მიწათსარგებლობის გენერალური გეგმის დამუშავების ფასი, შესრულების ვადა და ხელშეკრულების სხვა პირობები განისაზღვრება კონკურსანტის მიერ წარმოდგენილი საკონკურსო წინადადების შესაბამისად.
