წელს საქართველოში კონტაქტური ლინზების იმპორტი გაორმაგდა. ”საქსტატის” ინფორმაციით, 2015 წლის იანვარ-ივლისში საქართველოში იმპორტირებულია 0,2 ტონა ლინზა, რომლის ღირებულებამაც  38,8 ათასი დოლარი შეადგინა. 2014 წლის ანალოგიურ პერიოდში კი ქვეყანაში 0,1 ტონა კონტაქტური ლინზის იმპორტი დაფიქსირდა, საერთო ღირებულებით 23,8 ათასი დოლარი.

სტატისტიკური ინფორმაციიდან გამომდინარე,  წელს ყველაზე დიდ რაოდენობით კონტაქტური ლინზის იმპორტი, ანუ მთლიანი იმპორტის 50% უკრაინაზე მოდის, საიდანაც ქვეყანაში 0,1 ტონა კონტაქტური ლინზა შემოვიდა, რომლის ღირებულებამაც 22,6  ათასი დოლარი შეადგინა.

”საქსტატის” ინფორმაციით, 2014 წლის იანვარ-ივლისში ქვეყანაში  იმპორტირებული კონტაქტური ლინზის  50 %-ი ისევ უკრაინაზეა. აღსანიშნავია, რომ წლების განმავლობაში,  უკრაინიდან საქართველოში კონტაქტური ლინზის იმპორტი სტაბილურად 0,1 ტონაა.

2014 წლის მონაცემებით,  ქვეყანაში იმპორტირებულია 0,2 ტონა კონტაქტური ლინზები, საიდანაც  50 %-ი ისევ უკრაინაზე, ხოლო დანარჩენი აზერბაიჯანსა და სხვა ქვეყნებზე მოდის.

2013 წელს საქართველოში სულ 1 ტონა კონტაქტური ლინზების იმპორტი დაფიქსირდა, 2012 წელს კი - 0,3 ტონა. შესაბამისად, 2014 წელს 2013 წელთან შედარებით კონტაქტური ლინზების იმპორტი შემცირებულია 80 %-ით.  2013 წელს 2012 წელთან შედარებით კი კონტაქტური ლინზების იმპორტი გაზრდილია 233 %-ით. ხოლო 2014 წელს 2012 წელთან შედარებით იმპორტი 33 %-ითაა მომატებული.

კომპანია ”კენარში”, რომელიც საქართველოში ამერიკული კომპანია

”ალკონის” ოფიციალური წარმომადგენელია და რომლის ლინზებზეც საქართველოში დიდი მოთხოვნაა, განმარტავენ, რომ ბოლო პერიოდში კონტაქტურ ლინზებზე მოხმარება მზარდია. ”კენარში” აცხადებენ, რომ მათ ქსელში ძირითადა აშშ-დან და ევროპიდან იმპორტირებული კონტაქტური ლინზების რეალიზაცია ხდება.

 ”კენარში” ამბობენ, რომ ისინი მომხმარებელს მაღალი ხარისხის ლინზებს სთავაზობენ და მათი ფასიც დიფერენცირებულია - 1 დღიანი წყვილი ლინზის ღირებულება 4,60 ლარია, ხოლო ერთ თვიანი ფერადი ლინზის ფასი (წყვილზე) 70 ლარს, ხოლო ჩვეულებრივი ნომრიანი ლინზის ღირებულება, (წყვილი) 34 ლარს შეადგენს.

აღსანიშნავია, რომ დღეისათვის კონტაქტურ ლინზას მსოფლიოში 125 მლნ-მდე მომხმარებელი ყავს.