ბათუმიდან ფრენები შესაძლოა დაბალბიუჯეტიანმა ავიაკომპანიამ განახორციელოს. აღნიშნულ საკითხზე, აჭარის მთავრობა და ბათუმის საერთაშორისო აეროპორტის ოპერატორი კომპანია TAV Georgia ერთობლივად იმუშავებენ. ”ლოუკოსტერის” სახელი ამ დროისათვის ცნობილი არ არის, რადგანაც ჯერჯერობით უცნობია, რომელ კომპანიასთან მიაღწევს TAV-ი საბოლო შეთანხმებას.
დღეს, აჭარის ფინანსთა და ეკონომიკის მინისტრი დავით ბალაძე TAV-ის საქართველოს წარმომადგენლებს შეხვდა, სადაც მხარეებმა რეგიონში ტურისტების რაოდენობის ზრდის მიმართულებით სამომავლო ურთიერთთანამშრომლობის გეგმებზე იმსჯელეს.
შეხვედრაზე საუბარი რეგიონში ახალი დაბალფასიანი ავიაკომპანიების შემოყვანასაც შეეხო, რომელიც მგზავრებს არსებულ საბაზრო ფასებთან შედარებით მომსახურების დაბალ ტარიფებს შესთავაზებს.
როგორც აჭარის ფინანსთა და ეკონომიკის სამინისტროში განმარტავენ, შეხვედრის თემა ასევე ახალი ტურ-ოპერატორების დაინტერესების შედეგად, ბათუმის მიმართულებით ჩარტერული რეისების ზრდაც იყო. ახალი რეისების დანიშვნა კი აჭარით დაინტერესებული ტურისტების ზრდას შეუწყობს ხელს და რეგიონში ტურიზმის სექტორს კიდევ უფრო განავითარებს.
შეგახსენებთ, რომ TAV-ი თბილისისა და ბათუმის საერთაშორისო აეროპორტების ოპერირებას ახორციელებს. TAV-ს ტურისტულ სფეროში საქმიანობის საკმაოდ დიდი გამოცდილება აქვს.
ბოლო პერიოდში ერთ-ერთი მნიშვნელოვანი პროექტი კომპანიამ მაკედონიაში განახორიციელა, საუბარია ქვეყნის ტერიტორიაზე დაბალბიუჯეტიანი ავიაკომპანიის შეყვანაზე, შედეგად კი მაკედონიაში ტურისტების რაოდენობა 3 წელში 59% -ით გაიზარდა.
