თავისუფალი და აგრარული უნივერსიტეტების ბიზნესსკოლის დეკანის, გიგა ბედინიშვილის განცხადებით, ლარის კიდევ გაუფასურებას შიდა ფაქტორებთან ერთად გარე ფაქტორებიც ”ეხმარება”.
”კითხვა უნდა დაისვას ასე: რატომ უნდა გამყარდეს ლარი? რა არის ის შემაკავებელი პროცესები, რამაც შესაძლოა ლარის გაუფასურება შეაჩეროს?! რაიმე კარგი ხდება ქვეყნის შიგნით, ან ქვეყნის გარეთ? ჩემი პასუხია, რომ არც ქვეყნის შიგნით და არც ქვეყნის გარეთ სასიკეთო პროცესებთან საქმე არ გაქვს.
მართალია მთელს მსოფლიოში საკმაოდ ცუდი მილოდინებია, აღმოსავლეთში ბაზრები დაეცა. მოლოდინია, რომ ევროპული და ამერიკული ბაზრებიც დაეცემა. ნავთობის ფასი კიდევ უფრო ქვემოთ ჩამოვიდა. რუბლი კიდევ უფრო გაუფასურდა. გარეთ კარგი არაფერია ხდება და ამას ემატება ქვეყნის შიგნით არსებული ეკონომიკის სისუსტე, არასწორი ეკონომიკური პოლიტიკა”- განუცხადა "ჯი-ეიჩ-ენს" ბედინეიშვილმა.
თავისუფალი და აგრარული უნივერსიტეტების ბიზნესსკოლის დეკანის შექმნილი მდგომარეობიდან ერთადერთ გამოსავალს ხედავს იმაში, რომ მთავრობამ ეკონომიკური პოლიტიკა უნდა შეცვალოს, თუმც ხელისუფლებაში სათანადო სურვილებს ვერ ხედავს.
”საჭიროა, რომ მთავრობამ ეკონომიკური პოლიტიკა შეცვალოს. ისევ იგივე პრობლემებია: არათანაბარი ხარჯვის თვეების მიხედვით, ისევ არის პრობლემა არასაჭირო ბარიერების აღმართვის, ეკონომიკაში ზედმეტი რეგულაციების შემოღების.
მთავრობამ რადიკალურად უნდა შეცვალოს ეკონომიკური პოლიტიკა, რისი სურვილიც არ აქვს. არც ეკონომიკური ნება არ აქვთ და მგონი კომპეტენციის პრობლემაც არსებობს. და რომ შეპირდნენ მოსახლეობას და ეკონომიკის მოთამაშეებს ვინ დაუჯერებს? ამ ხნის განმავლობაში ეს მთავრობა ყოველთვის საპირისპიროს აკეთებდა: მუდმივი რეგულაციებისა და შეზღუდვების ზრდა. ეს ყველაფერი კი ასუსტებს ეკონომიკას. როდესაც ეკონომიკა სუსტია და გარეთ ცუდი ფაქტორებია, სუსტ ეკონომიკას წინააღმდეგობის გაწევა არ შეუძლია”, - აცხადებს "ჯი-ეიჩ-ენთან" საუბარში გიგა ბედინეიშვილი.
შეგახსენებთ, რომ ლარის კურსი დოლართან მიმართებაში 40%-ითაა გაუფასურებული. აქედან ზაფხულის პერიოდში ქართული ვალუტის კურსის ვარდნამ 5% შეადგინა, ეს იმ ფონზე, როდესაც ტურისტების ზრდის პირობებში, ხელისუფლება ლარის კურსის გამყარებას ”წინასწარმეტყველებდა”.
