საქართველოს პრემიერ-მინისტრმა აჭარაში ვიზიტისას, ქედაში კომპანია „კახური ტრადიციული მეღვინეობის“ მიერ ახლადგახსნილ ხილის გადამამუშავებელ ქარხანა დაათვალიერა. თანამედროვე ტექნოლოგიებით აღჭურვილი "აგრო ქედის" საწარმო სახელმწიფოს თანადაფინანსებით აშენდა, რისთვისაც 500 ათასი დოლარის შეღავათიანი აგროკრედიტი გაიცა.
ახა;ლი საწარმო ფერმერებს საშუალებას მისცემს მოწეული პროდუქცია მარტივად გაასაღონ, რადგანაც წლების განმავლობაში ფერმერი ვერ ახდენდა ხილის რეალიზაციას და კარგავდა შემოსავალს.
ამ ეტაპისთვის საწარმოში 36 ადგილობრივია დასაქმებული. საწარმოს სრული დატვირთვით ამოქმედების შემთხვევაში დასაქმებულთა რაოდენობა 50-მდე გაიზრდება.
საწარმოში ყველა სახეობის ხილის მიღება და გადამუშავება მოხდება, საიდანაც შემდგომ ხილფაფები, ჯემები, მურაბები და ასევე საწებლები დამზადება.
პროდუქცია ადგილზე დაფასოვდება და რეალიზაცია გაუკეთდება როგორც საქართველოს ბაზარზე, ასევე ყველა იმ ქვეყანაში, სადაც ,,კახური ტრადიციულ მეღვინეობას" ექსპორტზე გააქვს ნაწარმი.
საგულისხმოა ისიც, რომ მსგავსი ტიპის ქარხანა საქართველოში პირველია და იგი ორიენტირებულია ეკოლოგიურად სუფთა, ბიოლოგიურად საიმედო პროდუქციის რეალიზაციაზე.
აღსანიშნავია, რომ ,,აგრო ქედას" საწარმოს მშენებლობას გასულ წელს ჩაეყარა საფუძველი. საწარმო უკვე მზადაა ხილის მისაღებად. საწარმოში ტყემლის გადამუშავების სატესტო ჩვენება უკვე მოეწყო. ქარხანაში დამონტაჟებულია თანამედროვე დანადგარები, რომლებიც ევროსტანდარტების მოთხოვნებს პასუხობს. ქარხანა ამ ეტაპისთვის მზადაა მიიღოს საშუალო და მაღალი ხარისხის ხილი. ”აგრო ქედის” საწარმო მთლიანად აჭარის რეგიონს მოემსახურება.
საწარმოს მშენებლობისათვის ინვესტორმა ფართი სახელმწიფოსგან პირდაპირი მიყიდვის ფორმით 30000 ლარად შეიძინა. საპრივატიზაციო პირობების მიხედვით, "კახური ტრადიციული მეღვინეობა - აგრო ქედა" ვალდებულია ხილის გადამამუშავებელი საწარმოს ამოქმედებიდან 5 წლის განმავლობაში, საწარმოს პროფილი უწყვეტად შეინარჩუნოს და ასევე ამ ხნის განმავლობაში საწარმოში საქართველოს არანაკლებ 20 მოქალაქე დაასაქმოს.
ასევე "კახური ტრადიციული მეღვინეობა - აგრო ქედამ" ვალდებულება აიღო, რომ საკუთრებაში გადაცემულ უძრავ ქონებაზე სასაწყობე მეურნეობასაც მოაწყობს.
