ექსპერტი ეკონომიკის საკითხებში გიგა ბედინეიშვილი ”ჯი-ეიჩ-ენთან” საუბრისას აცხადებს, რომ 150 -დან 160 ლარამდე პენსიის ზრდა პენსიონრებს სოციალურ -ეკონომიკურ მდგომარეობას ვერ შეუცვლის.
”რა თქმა უნდა, არ არის საკმარისი. ეს ნიშნავს, რომ 6-7 % -ით გაიზრდება პენსია, მაშინ, როდესაც დევალვაცია გვქონდა 30 %-იანი. ინფლაცია კი 10-12 %-ი. გააჩნია რაზეა ლაპარაკი, წამლები ალბათ კიდევ უფრო მეტად არის გაძვირებული. ასე, რომ 10 ლარით პენსიის მომატება ვერ დაეხმარება პენსიონერებს. თუ ეს იყო მათი მიზანი, სოციალური პირობების გაუმჯობესება, ეს არ გამოვა, არაფერ შეღავათს არ მისცემს.
ახალი მთავრობის პირობებში პენსიონრების ცხოვრების დონე იმდენად გაუარესდა, რომ 10 ლარი ვერაფერს მისცემს. ამის მთავარი მიზეზი ფასის ზრდა და ლარის სისუსტეა
შესაძლოა უნდათ დაიყვანონ ვითარება ლარის გაუფასურებამდე არსებულ ნიშნულამდე, მაგრამ არ გამოსდით, არასაკმარისი კომპენსაციაა იმ გაუარესებული ეკონომიკური მდგომარეობისა, რომელშიც აღმოჩნდა ყველა, მათ შორის პენსიონრები”, _ აცხადებს თავისუფალი და აგრარული უნივერსიტეტის ბიზნეს სკოლის დეკანი გიგა ბედინეიშვილი .
შეგახსენებთ, რომ 2014 წლის ნოემბერში ფინანსთა მინისტრმა ნოდარ ხადურმა განაცხადა, რომ 2015 წლის სექტემბრიდან 150-ლარიანი პენსია ყველა ასაკით პენსიონერს 10 ლარით გაეზრდება, ნაცვლად იმისა, რომ პენსიები მხოლოდ სოციალურად დაუცველის სტატუსის მქონე პენსიონერებს გაეზარდოთ.
ამ გადაწყვეტილების შეცვლის შესახებ მას შემდეგ გახდა ცნობილი, რაც 2014 წლის ნოემბერში პრემიერ-მინისტრმა ირაკლი ღარიბაშვილმა და მთავრობის ეკონომიკურმა გუნდმა ბიუჯეტის პროექტი განიხილეს.
