აჭარის მთავრობა ბათუმში, მეჯინისწყლის დასახლებაში მდებარე 150 377 კვ.მ არასასოფლო-სამეურნეო დანიშნულების მიწის ნაკვეთს პირობებიან აუქციონზე გაასხვისებს. მიწის ნაკვეთის გაყიდვაზე გადაწყვეტილება აჭარის მთავრობამ უკვე მიიღო.
როგორც აჭარის ფინანსთა და ეკონომიკის სამინისტროში განმარტავენ, მიწის ნაკვეთით დაინტერესებული ინვესტორი უკვე არსებობს.
ირკვევა, რომ მეჯინისწყლის დასახლებაში მდებარე 150 377 კვ.მ არასასოფლო-სამეურნეო დანიშნულების მიწის ნაკვეთი ამ დროისათვის, თვითნებურად დაკავებული აქვთ მოქალაქეებს. აღნიშნულ ტერიტორიაზე განთავსებულია ანგარი, რომელიც დროთა განმავლობაში ზიანდება და ხდება მისი შემადგენელი ნაწილების მიტაცება. შესაბამისად, მცირდება ქონების ღირებულებაც.
აჭარის ფინანსთა და ეკონომიკის მინისტრის დავით ბალაძის განმარტებით, სამინისტროს მიზანშეწონილად მიაჩნია, დემონტაჟის პირობით, აღნიშნულ მიწის ნაკვეთზე განთავსებული ანგარის ტიპის შენობა-ნაგებობის პრივატიზება განხორციელდეს.
აღსანიშნავია, რომ „აუდიტორული კომპანია იბერ აუდიტ კონსალტინგის” მიერ დადებული აუდიტორული დასკვნით, ბათუმში, მეჯინისწყლის დასახლებაში მდებარე 150 377 კვ.მ არასასოფლო-სამეურნეო დანიშნულების მიწის ნაკვეთზე განთავსებული ანგარის ტიპის შენობა-ნაგებობის დემონტაჟის შედეგად შესაძლებელია მიღებული იქნას მეორადი რკინის კონსტრუქცია, ღირებულებით - 17 500 ლარი.
”ეს ის ქონებაა, რომლის მოვლა-პატრონობა საკმაოდ ძვირი ჯდება. არის ფაქტები, როდესაც მოსახლეობის მხრიდან ხდება მისი დატაცება და უკანონოდ განკარგვა. შესაბამისად მივიღეთ გადაწყვეტილება, რომ ყველა ასეთი ფაქტი უკანონო დატაცებებთან დაკავშირებით, შევატყობინოთ შესაბამის სამსახურებს. შესაბამისად ჩვენ ამ ქონებებს გავიტანთ აუქციონზე და გავასხვისებთ, ვინაიდან არსებობს დაინტერესებული ადამიანები, მათ შეძენასთან დაკავშირებით, რომლებიც შემდგომ მას თავიანთი ბიზნესსაქმიანობისთვის გამოიყენებენ”, აღნიშნა დავით ბალაძემ.
