"30 მაისს ხელისუფლება, 31 მაისიდან კი ქვეყანა უნდა შეიცვალოს", - ამის შესახებ ჟურნალისტებს დღეს "ალიანსი საქართველოსთვის" საარჩევნო სიის პირველმა ნომერმა თინა ხიდაშელმა განუცხადა.
მისივე განმარტებით, ქვეყნის ხელისუფლების შესაცვლელად და იმისთვის, რომ სახელმწიფო მანქანა ხალხისა და არა ჩინოვნიკების სამსახურში იდგეს, სწორედ "ალიანსის" გუნდი იბრძოლებს.
"ალიანსის" სია არის ყველაზე რეალური, რომელიც ორიენტირებულია გამარჯვებაზე, რადგან ამ სიას წარმოადგენენ ადამიანები, რომლებიც ათეული წლების განმავლობაში იბრძოდნენ საქართველოს მოქალაქეების ინტრესების დასაცავად. ვერ მეტყვით ვერც ერთ სიას ცესკო-ში შეტანილს, სადაც წარმოდგენილი იყოს ასეთი ლაშქარი", - განმარტავს ხიდაშელი.
შეგახსენებთ, რომ "ალიანსი საქართველოსთვის" ლიდერი ირაკლი ალასანია თბილისის მერობის კანდიდატად დღეს ოფიციალურად დარეგისტრირდა.
დღეს, 30 აპრილს, ცენტრალურ საარჩევნო კომისიაში არჩევნებისთვის მერობის კანდიდატების წარდგენის ვადა იწურება. კანონის შესაბამისად, 30 აპრილის ჩათვლით, პოლიტიკურმა პარტიებმა ცესკოში როგორც მერობის, ისე საკრებულოს მაჟორიტარი დეპუტატობის კანდიდატები და პროპორციული სიები უნდა წარადგინონ.
ამავე ვადაში უნდა მოხდეს პარლამენტის შუალედური არჩევნებისთვის პარტიებისა და საარჩევნო ბლოკების მიერ საარჩევნო ოლქებში, კერძოდ, ოზურგეთში, გურჯაანსა და დიდუბეში მაჟორიტარი კანდიდატები წარდგენაც.
ბოლო მონაცემებით, თბილისის მერის არჩევნებზე ერთმანეთს ცხრა კანდიდატი დაუპირისპირდება.
ადგილობრივი თვითმმართველობის არჩევნებში მონაწილეობას 16 პარტია და სამი პოლიტიკური ბლოკი მიიღებს.
