თბილისის საქალაქო სასამართლოსთან არასამათავრობო ორგანიზაციების წევრებმა მშვიდობიანი აქცია გამართეს. აქციის მონაწილეებმა „არა პანორამას“ დროს დაკავებული და დაჯარიმებული პირების მიმართ საქალაქო სასამართლოს გადაწყვეტილება გაასაჩივრეს, რომლის თანხმადაც საქალაქო სასამართლომ 7 პირს 100 ლარიანი ჯარიმა შეუფარდა.
აქციის მონაწილეებმა დღეს პირი აიკრეს.
როგორც საია-ს თავმდჯომარე ანა ნაცვლიშვილმა განაცხადა, დღეს ისინი აპროტესტებენ პარტნიორ უფლებადამცველ ორგანიზაციებთან ერთად, საქალაქო სასამართლოს გადაწყვეტილებას, რომელიც არის ძალიან ცუდი პრეცენდენტი.
მისი თქმით, სასამართლომ ამ გადაწყვეტილებით სიტყვისა და გამოხატვის თავისუფლებას დაარქვა წვრილმანი ხულიგნობა. მისივე თქმით, სახელმწიფომ რეალურად უნდა შეაფასოს ვითარება.
„სახელმწიფომ რეალურად უნდა შეაფასოს ვითარება და არ ეძიოს პრობლემები იმ ადამიანებში, რომლებიც სახელმწიფოს მოქმედებებზე აკეთებენ აქცენტს. პრობლემები უნდა ეძიონ საკუთარ თავში. პირი გვაქვს აკრული იმიტომ, რომ სიტყვის თავისუფლებას ექმნება საფრთხე. თუ ჩვენ მსგავს გადაწყვეტილებებზე არ გვექნება ძალიან მკაცრი პოზიცია და მშვიდობიანი ფორმით თუ არ შევეცდებით, რომ გავაპროტესტოთ უკანონო გადაწყვეტილებები, მაშინ ყველა ჩვენგანს ხვალ შეიძლება სხვა რამის გამო აუკრან პირი, თუ ეს სახელმწიფოს არ მოეწონება“, - განაცხადა ნაცვლიშვილმა.
მისივე თქმით, საქალაქო სასამართლოს გადაწყვეტილებას ასაჩივრებენ სააპელაციო სასამართლოში და საია-ს თავმჯდომარის განცხადებით, იმ შემთხვევაში თუ სააპელაციო სასამართლო ძალაში დატოვებს საქალაქო სასამართლოს გადაწყვეტილებას, მაშინ ისინი გამოიყენებენ, როგორც ქვეყნის შიგნით არსებულ სამართლებრივ საშუალებას, საკონსტიტუციო სასამართლოს, ასევე საერთაშორისო მექანიზმს მიმართავენ იმისთვის, რომ აღნიშნულ ფაქტს მიეცეს ადეკვატური სამართლებრივი შეფასება ქვეყნის გარეთ.
სააპელაციო სასამართლოში საია-მ საჩივარი დღეს შეიტანა.
