მოძრაობა "სამართლიანი საქართველოსთვის" ლიდერის ზურაბ ნოღაიდელის მტკიცებით, რუსეთთან ურთიერთობის აღდგენას საქართველოს მოსახლეობის 80 % უჭერს მხარს.
"ჯერ კიდევ გასული წლის სექტემბერში ჩატარებული სოციოლოგიური გამოკითხვების დროს მოსახლეობის მხოლოდ 10 პროცენტი ამბობდა, რომ რუსეთთან ურთიერთობები უნდა მოწესრიგდეს. დღეს მოსახლეობის უკვე 80 პროცენტი ფიქრობს ასე. რატომ? იმიტომ, რომ ამ მიმართულებით ჩვენს მიერ გადადგმულმა ნაბიჯებმა კონკრეტული შედეგი მოიტანა. ცხინვალიდან მოზარდები გამოვაშვებინეთ და ყველამ კარგად იცის, რომ ეს ჩვენი დამსახურებაა.გარდა ამისა, საახალწლოდ და სააღდგომოდ მოსკოვსა და თბილისს შორის განხორციელდა ჩარტერული ფრენები. მჯერა, რომ ორ ქვეყანას შორის მუდმივი სატრანსპორტო (მათ შორის, საავიაციო) მიმოსვლა აღდგება. დარწმუნებული ვარ იმაშიც, რომ რუსული ბაზარი ქართული პროდუქციისთვის გაიხსნება, რითაც ჩვენი გლეხი და მეწარმე დამატებით შემოსავლებს მიიღებს. ამით ქვეყანა ფეხზე დადგება და განვითარდება, რაც ქვეყნის გამთლიანების უკეთეს შანს მოგვცემს. ჩვენ, ჯერ კიდევ ოპოზიციაში ყოფნის პირობებში, ვაპირებთ, ვიმუშავოთ იმაზე, რომ დევნილები დაბრუნდნენ კოდორის ხეობასა და ახალგორის რაიონში. იქ აუცილებლად უნდა გათბეს ქართული კერა და ამით საქართველომ გაერთიანების შანსი დაიბრუნოს", - აცხადებს ნოღაიდელი.
მისივე განმარტებით, საქართველო ვერ გაერთიანდება კიდევ ერთი ისეთი უაზრო ომით, როგორიც სააკაშვილმა 2008 წლის აგვისტოში უკვე მოაწყო.
"ამისთვის საჭიროა მშვიდობიანი, თანმიმდევრული მოლაპარაკებები. ყველასთვის ნათელია, რომ ცხინვალთან და სოხუმთან მოლაპარაკებები შედეგს ვერ მოიტანს, თუ პარალელურად გაგრძელდება რუსეთის დედის გინება და მე ამის გაკეთებას ნამდვილად არ ვაპირებ. საზოგადოება კარგად ხედავს, რომ რუსეთთან ურთიერთობების მოგვარება (რაც საქართველოს გამთლიანების აუცილებელი წინაპირობაა) ჩვენ დღესვე შეგვიძლია და ამას ხელისუფლებაში მოსვლის შემდეგ უკეთესად გავაკეთებთ. მთავარი ის არის, რომ ჩვენს პოლიტიკას ხალხი უჭერს მხარს. ჩვენ არ დავუშვებთ, რომ იმ ხალხის ხმები, ვინც მხარს გვიჭერს, სააკაშვილის ჯიბეში აღმოჩნდეს", - განმარტავს ქვეყნის ყოფილი პრემიერ-მინისტრი.
