"ფრიდომ ჰაუსის" მიერ გამოქვეყნებულ მედიის თავისუფლების შესახებ ყოველწლიური ანგარიშის შედეგებს საქართველოსთვის კატასტროფულს და შემაშფოთებელს უწოდებს სახალხო დემოკრატების ლიდერი ნიკა ივანიშვილი.
"პასუხისმგებელი ამ შედეგებზე ხელისუფლებაა, რომელმაც არაფერი გააკეთა მედიის თავისუფლებისათვის, არცერთი ინიციატივა, არცერთი საკანონმდებლო ნაბიჯი არ იქნა გადადგმული პრესაზე ზეწოლის ასაცილებლად. პირიქით კი ძალიან ბევრი ფაქტი ვიცით, თუ რა უხეშ ძალადობას ეწევა ხელისუფლება მედიის გაკონტროლებისა და დაქვემდებარებისათვის. ერთი ინიციატივა გაახმოვანა პრეზიდენტმა რეგიონალური ტელევიზიების საგადასახადო დავალიანების ამნისტიის სახით და ბოლომდე არც ეს იქნა მიყვანილი. „ფრიდომ ჰაუსის" კვლევის ანგარიში საქართველოში ნაციონალური მოძრაობის მმართველობის პერიოდში მედიის თავისუფლების ხარისხის კატასტროფულ შემცირებაზე მიგვანიშნებს და სრულად ასახავს ჩვენს ქვეყანაში არსებულ სამწუხარო რეალობას. სახალხო დემოკრატები და პირადად მე, ადგილობრივი არჩევნების დამთავრებისთანავე ვაპირებთ, საკანონმდებლო ინიციატივით შევიდეთ პარლამენტში „პრესის თავისუფლების აქტით", რომელიც საქართველოს კონსტიტუციაში მედიის თავისუფლების კუთხით არსებული ნორმების გაძლიერებას მოემსახურება და დაიცავს როგორც პრესის, ასევე ჟურნალისტების უფლებებს", - განაცხადა ნიკა ივანიშვილმა.
