საპარტნიორო ფონდის აღმასრულებელი დირექტორი ირაკლი კოვზანაძე ნიუ-იორკში სუვერენული ფონდების კონფერენციაში მონაწილეობს.
„ეს არის მაღალი დონის შეხვედრა, სადაც მსოფლიოს სხვადასხვა ქვეყნის სუვერენული ფონდების, საპენსიო ფონდების, მრავალმილიარდიანი აქტივების მფლობელები და ადმინისტრატორები ერთმანეთს უზიარებენ საკუთარ გამოცდილებას, ეცნობიან სხვადასხვა ბაზრის პერსპექტივებს და საფუძველს უყრიან მომავალ საერთო პროექტებს,“- განაცხადა ირაკლი კოვზანაძემ.
ირაკლი კოვზანაძე პოტენციურ პარტნიორებს გააცნობს საპარტნიორო ფონდის მანდატს, ფონდის მიმდინარე, იმპლიმენტაციის ეტაპზე და უკვე დასრულებულ პროექტებს და ისაუბრებს ქვეყნის საინვესტიციო გარემოს შესახებ. ღონისძიების ფარგლებში ასევე დაგეგმილია ირაკლი კოვზანაძის შეხვედრა რამდენიმე საფინანსო ინსტიტუტის და კერძო საინვესტიციო ფონდის ხელმძღვანელ პირებთან, სადაც საუბარი იქნება საპარტნიორო ფონდისთვის დამატებითი ფინანსური რესურსის მოზიდვისა და ფონდთან ერთად შესაძლო ერთობლივი პროექტების განხორციელების შესახებ საქართველოში.
სუვერენული ფონდების კონფერენცია ნიუ-იორკში 27 ივლისს იმართება. კონფერენციის ფარგლებში უმაღლესი დონის ბიზნეს ლიდერები ისაუბრებენ ინსტიტუციონალური ინვესტირების პერსპექტივებზე უახლოესი ხუთი წლის განმავლობაში და ასევე იმ გამოწვევებზე, რომლებსაც გრძელვადიანი სახელმწიფო ინვესტორები აწყდებიან.
სააქციო საზოგადოება საპარტნიორო ფონდი საქართველოს მთავრობის მიერ 2011 წელს დაარსდა. სახელმწიფო ფლობს ფონდის 100%-ს. საპარტნიორო ფონდის აქტივები 5 მილიარდ ლარს აჭარბებს. ფონდი ფლობს „საქართველოს რკინიგზის“, „საქართველოს ნავთობისა და გაზის კორპორაციის“, „საქართველოს სახელმწიფო ელექტროსისტემის“,
„ელექტროსისტემების კომერციული ოპერატორისა“ და ნაწილობრივ, „თელასის“ აქციებს. ფონდის ერთ-ერთი მთავარი ამოცანაა, საინვესტიციო მიმართულებებთან ერთად, ამ სახელმწიფო სტრატეგიული აქციების სწორი კორპორატიული მართვა.
