"ეროვნული საბჭოს" ერთ-ერთი ლიდერი კობა დავითაშვილი კატეგორიულად უარყოფს მედიით გავრცელებულ ინფორმაციას იმის შესახებ, თითქოს ვლადიმერ ჟირინოვსკიმ შეხვედრისას მას ხელი არ ჩამოართვა.
"ჟირინოვსკის ოფიციალური შეხვედრის დაწყებამდე, გარეთ შევხვდი და ხელი ერთმანეთს სწორედ მაშინ ჩამოვართვით. აქედან გამომდინარე, ტყულია ის, თითქოს მას ხელი გავუწოდე და არ ჩამომართვა. მე და ჟირინოვსკი მეგობრები არ ვართ და არც თბილი ურთიერთობა გვაქვს, მაგრამ შეხვედრამ კორექტულად ჩაიარა", - განაცხადა დავითაშვილმა დღეს, "პრაიმ-ტაიმის" პრესკლუბში, ჟურნალისტებთან შეხვედრისას.
რაც შეეხება უშუალოდ მოსკოვში გამართულ შეხვედრებს, "ეროვნული საბჭოს" ერთ-ერთი ლიდერის განმარტებით, "რუს ოპოზიციონერებს იმის გამო შეხვდა, რომ საზოგადოებრივი აზრის ჩამოყალიბებაში მათ ხელისუფლებისგან განსხვავებით უფრო მეტი ძალა აქვს".
"ჩემი ამოცანა ის არის, რომ საქართველოს ტერიტორიული გამთლიანების საკითხში რუსულმა ოპოზიციამ აფხაზებთან და ოსებთან ქართველების დიალოგს ხელი არ შეუშალოს და დაეხმაროს კიდეც. ამ მიზნით შევხვდი ასევე "კომუნისტური პარტიის" ლიდერებს, მათ შორის ლეონიდ კალაშნიკოვს. იგი რუსეთის სათათბიროში საერთაშირისო ურთიერთობათა კომიტეტის თავმჯდომარის მოადგილეა. შევხვდი ასევე ლეონტიევს, რომელიც შემიძლია საქართველოს პოტენციურ მხარდამჭერად განვიხილოთ. ისინი ჩვენი შეხვედრებით კმაყოფილები დარჩნენ და მზადყოფნა გამოხატეს ისაუბრონ პირობებზე, რის სანაცვლოდაც დიალოგის პროცესს ხელს არ შეუშლიან" -განმარტა დავითაშვილმა.
