საქართველოს საგარეო საქმეთა სამინისტრო მიესალმება ავსტრიის დედაქალაქ ვენაში ირანის ბირთვული პროგრამის თაობაზე E3/EU+3 ფორმატის მოლაპარაკებების წარმატებით დასრულებას და მხარეებს შორის ერთობლივ მოქმედებათა ყოვლისმომცველი გეგმის ხელმოწერას.
საგარეო უწყების ცნობით, ქართული მხარე გამოთქვამს კმაყოფილებას, რომ ხანგრძლივი და აქტიური დიპლომატიური პროცესის შედეგად, მხარეებმა მიაღწიეს კონსენსუსს და დიალოგის გზით შეთანხმდნენ ირანის ბირთვული პროგრამის ირგვლივ არსებული რთული საკითხების გადაჭრის გეგმაზე. ვიმედოვნებთ, რომ გეგმით გათვალისწინებული შემდგომი პროცესი განხორციელდება შეთანხმებული პარამეტრების სრული დაცვით.
სამინისტრო მიიჩნევს, რომ ირანის ბირთვულ პროგრამასთან დაკავშირებით შეთანხმების მიღწევა წარმოადგენს საერთაშორისო მშვიდობისა და სტაბილურობისკენ გადადგმულ ძალზედ მნიშვნელოვან ნაბიჯს და მიესალმება მოლაპარაკებებში ჩაბმული მხარეების განსაკუთრებულ ძალისხმევას ამ მიმართულებით.
უწყების ცნობით, ამასთან, მიღწეული შეთანხმება განაპირობებს ურთიერთობების ნორმალიზებას ირანსა და დასავლეთის სახელმწიფოებს შორის, რაც გააჩენს ახალ ეკონომიკურ შესაძლებლობებს როგორც რეგიონის სახელმწიფოებისთვის, ისე მთლიანად მსოფლიოსთვის.
