თუ არ ვიქნებით იმ საერთო დღის წესრიგის ნაწილი, რომლითაც დღეს მსოფლიო ელაპარაკება რუსეთს, არაფერი გამოვა, - ამის შესახებ თავდაცვის მინისტრმა თინა ხიდაშელმა მეცნიერებათა ეროვნულ აკადემიაში განაცხადა, სადაც ალექსანდრე ქართველის (ქართველიშვილი) მიმართ მიძღვნილ საზეიმო ღონისძიებას დაესწრო.
მისი თქმით, საოკუპაციო ხაზთან მიმდინარე პროცესი ძალიან მძიმეა, თუმცა საქართველოს ხელისუფლება თავის მიზანმიმართულ პოლიტიკას განაგრძობს.
,,ხელისუფლება თავის ძალიან მკვეთრ, მიზანმიმართულ პოლიტიკას განაგრძობს, იმისთვის, რომ საერთაშორისო თანამეგობრობასთან ერთად, საბოლოო მიზნამდე უფრო მარტივად მივიდეთ. ჩვენ თუ არ ვიქნებით იმ საერთო დღის წესრიგის ნაწილი, რომლითაც დღეს მსოფლიო ელაპარაკება რუსეთს, არაფერი გამოვა“, - განაცხადა მინისტრმა.
მისივე თქმით, ასეთი ქმედებები ნამდვილად არ ასხამს წყალს რუსეთის წისქვილზე. ,,დარწმუნებული ვარ, რომ ყველა საერთაშორისო ორგანიზაციისგან პასუხი ადეკვატური იქნება. საქართველო, საბოლოო ჯამში, საკუთარ მიზანს უფრო მარტივად მიაღწევს, რაც უფრო მეტ მსგავს არაადეკვატურ ქმედებას განახორციელებს რუსეთი“, - განმარტა ხიდაშელმა.
შეგახსენებთ, 10 ივლისს, რუსეთის საოკუპაციო ძალებმა გორის რაიონის სოფელ წითელუბანსა და ოკუპირებული ახალგორის რაიონის სოფელ ორჭოსანის მიმდებარე ტერიტორიაზე ე.წ. საზღვრის აღმნიშვნელო ბანერები აღმართეს. საოკუპაციო ხაზს მიღმა მოექცა ბაქო-სუფსის მილსადენის დაახლოებით 1600-მეტრიანი მონაკვეთი. რუსული მხარის კონტროლირებად ტერიტორიაზე მოექცა 52 ჰექტარი მიწის ფართობი და დაზარალდა 97 ოჯახი. ჯერჯერობით უცნობია, მისცეემენ თუ არა საოკუპაციო ძალები ადგილობრივებს ქერისა და ხორბლის მოსავლის აღებას საშუალებას.
