დღეს საპარლამენტო ფრაქცია „ქართული ოცნების“ დეპუტატებმა ირაკლი ტრიპოლსკიმ, ზაქარია ქუცნაშვილმა, დიმიტრი ხუნდაძემ და მირიან წიკლაურმა კანონპროექტი „საქართველოს მაღალმთიანი რეგიონების განვითარების შესახებ“ დუშეთის და ყაზბეგის მოსახლეობას გააცნეს. ამავე კანონით ხვალ დეპუტატები თიანეთის მოსახლეობის წინაშე წარსდგებიან. ადგილობრივ მოსახლეობასთან შეხვედრები ამერიკის შეერთებული შტატების დემოკრატიული ინსტიტუტის მხარდაჭერით ხორციელდება.
ირაკლი ტრიპოლსკი, დუშეთის მაჟორიტარი დეპუტატი:
-„ამ კანონპროექტს რამდენიმე ათეული წელია მთიანი რეგიონების მოსახლეობა ელის. იცით, დღეს რა მდგომარეობაა საქართველოს მთიანეთში. თითქმის მთლიანად არის დაცლილი საქართველოს მთიანი ზოლი. 2002 წლის მონაცემებით, 164 სოფელი უკვე გაუკაცრიელდა, ხოლო 152 სოფელში 10 და ნაკლები კაცი ცხოვრობს. ჩვენ მთავარ პრიორიტეტში ჩავდეთ მთიანი რეგიონების განვითარება და ეს უკვე მალე განხორციელდება. თუმცა, გეტყვით, რომ მხოლოდ ამ ინიციატივებით არ შემოვიფარგლებით. კონკრეტულ საკითხებზე მუშაობა გრძელდება“.
მირიან წიკლაური, ყაზბეგის მაჟორიტარი დეპუტატი:
-„ ძნელია იმის გადმოცემა, თუ რას განიცდის დღეს ყაზბეგის მოსახლეობა. ეს ალბათ ოცნებაზე მეტი იყო. ჩვენ შევძელით ჩვენი ქვეყნისთვის სასიცოცხლოდ მნიშვნელოვანი კანონპროექტის შემუშავება. ეს მართლაც იქნება საქართველოს მთის გადარჩენის საწინდარი. ვიმედოვნებთ, ამ კანონპროექტის ამუშავების შემდეგ, მოსახლეობა დაუბრუნდება მამაპაპისეულ კერიას და მთაში სიცოცხლე დაბრუნდება. ახლა ჯერი ხალხზეა, რამდენად სრულად და დროულად გამოიყენებს ადგილობრივი მოსახლეობა იმ ინიციატივებს, რაც ჩვენ კანონში ჩავდეთ.
საქართველოს მაღალმთიან რეგიონებში მძიმე სოციალურ-ეკონომიკური და დემოგრაფიული მდგომარეობა აუცილებლად გამოსწორდება“.
რეგიონალური შეხვედრები ადგილობრივი მუნიციპალიტეტების ხელმძღვანელობით გაიმართა.
