სწორედ ოკუპაცია არის მთავარი მიზეზი იმისა, თუ რატომ უნდა საქართველოს გახდეს ცივილიზებული სამყაროს წევრი, - ამის შესახებ თავდაცვის მინისტრმა გორის რაიონში ე.წ. საზღვრის აღმნიშვნელი ახალი ბანერების დამონტაჟების ფაქტის კომენტირებისას განაცხადა.
თინა ხიდაშელის შეფასებით, სამწუხაროდ, არაფერი განსაკუთრებული არ მომხდარა, რადგან ეს მცოცავი ანექსია სახეზეა 2008 წლიდან მოყოლებული.
„არაფერი განსაკუთრებული არ მომხდარა. სამწუხაროდ, იმიტომ, რომ ეს მცოცავი ანექსია სახეზეა 2008 წლიდან მოყოლებული, ქვეყნის 20% ოკუპირებულია და 2 კილომეტრით მეტს გადმოწვენ საზღვარს თუ 20 მეტრით რუსები, ეს ძალიან ცუდია, თუმცა იმავე ხაზის გაგრძელებაა, რაც ქვეყანაში დიდი ხანია, ხდება”, - განაცხადა მინისტრმა.
მისივე თქმით, რუსებს საკუთარი ხელით მოუწევთ იმ ტრანსპარანტების უკან, ოფიციალური საბჭოთა კავშირისდროინდელი საზღვრისკენ გადაწევა.
„ჩვენი გზა ევროატლანტიკური ინტეგრაციისკენ სწორედ ერთ-ერთი მთავარი მიზეზია ოკუპაციის, ძალმომრეობის, ძალადობისგან თავის დაღწევისა. მინდა დაგარწმუნოთ, რომ საქართველო ამ 20 მეტრს ან 2 კილომეტრს კი არა, იმ 20%-ს დაიბრუნებს და რუსებს საკუთარი ხელით მოუწევთ იმ ტრანსპარანტებისა თუ ტრაფარეტების, რასაც დგამენ ჩვენს მიწაზე, უკან ოფიციალური საბჭოთა კავშირისდროინდელი საზღვრისკენ გადაწევა“, - განაცხადა ხიდაშელმა.
გორის რაიონის სოფელ წითელუბნისა და ოკუპირებული ახალგორის რაიონის სოფელ ორჭოსანის მიმდებარე ტერიტორიაზე, 10 ივლისს, რუსეთის საოკუპაციო ძალების მიერ, ე.წ. ,,საზღვრის“ აღმნიშვნელი ბანერები უკანონოდ აღიმართა. ოკუპირებულ ტერიტორიაზე მოექცა ასევე „ბაქო-სუფსას“ მილსადენის გარკვეული სეგმენტი.
