პრემიერ-მინისტრმა ირაკლი ღარიბაშვილმა კახი კალაძესთან დაპირისპირების თაობაზე გავრცელებულ ჭორებს წერტილი დაუსვა. როგორც პრემიერმა „2030“-ის ეთერში განაცხადა, მათ „გამორჩეული მეგობრული ურთიერთობა“ აქვთ. მედიაში გავრცელებულ ინფორმაციას პრემიერს და ვიცე-პრემიერს შორის უთანხმოების თაობაზე ირაკლი ღარიბაშვილი აღიქვამს როგორც „ნაციონალური მოძრაობის“ მიზანმიმართულ მცდელობას ჩაშალოს არსებული ჯანსაღი ურთიერთობები.
„ჩემთვის პირველ რიგში, მნიშვნელოვანი არის ადამიანური ურთიერთობები. მე და კახას გვაქვს მართლაც გამორჩეული მეგობრული ურთიერთობა. ის, რომ რამდენიმე განაწყენებული და გაბოროტებული ადამიანი ცდილობდა ჩვენს შორის გაუგებრობის შექმნას, მათი ეს მცდელობა, რა თქმა უნდა, დარჩა წარუმატებელი. მეც და კახიც ვაცნობიერებთ იმ პასუხისმგებლობას, რომელიც ჩვენი სახელმწიფოს და მოქალაქეების წინაშე გვაკისრია. ჩვენს შორის გამორიცხულია რაიმე სახის დაპირისპირება არსებობდეს. ეს არის აბსურდი. თუმცა ეს არის იგიგვე „ნაციონალური მოზრაობის“ (შეიძლება შიდა გუნდიდანაც იყონ ვიღაცეები) მიზანმიმართულად დამკვიდრებული მცდელობა, რომლებსაც არ სურთ ეს ჯანსაღი ურთიერთობები. გარწმუნებთ, რომ არავითარი დაპირისპირება მე არ მაქვს, არც მექნება და ვერც ვერავინ ვერ ჩადგება ჩვენს შორის. ჩვენ პირველ რიგში ვართ მეგობრები და შემდეგ ვართ თანამშრომლები. ჩვენ ოჯახებითაც ვართ ძალიან ახლოს, - განაცხადა პრემიერ-მინისტრმა და დაამატა: მინდა, რომ ამ საკითხს წერტილი დავუსვათ დღეს, ამ ეთერში."
