დღეს, 29 აპრილს, 11:30 საათზე ბებრისციხეს ერთობლივად მოინახულებენ საქართველოს კულტურის, ძეგლთა დაცვისა და სპორტის მინისტრი ნიკოლოზ რურუა და საქართველოს კულტურული მემკვიდრეობის დაცვის ეროვნული სააგენტოს გენერალური დირექტორი ნიკოლოზ ვაჩეიშვილი.
როგორც "ჯი-ეიჩ-ენს" საქართველოს კულტურული მემკვიდრეობის დაცვის ეროვნული სააგენტოდან აცნობეს, მცხეთაში ბებრისციხის ტრიტორიაზე ჩამოწოლილმა მეწყერმა ძეგლის ჩრდილო-აღმოსვლეთ კედელი მთლიანად ჩამოშალა. განადგურების პირას იმყოფება ძეგლის ინტერიერის დასავლეთ კედელიც.
დღეს დილიდან საქართველოს კულტურული მემკვიდრეობის დაცვის ეროვნული სააგენტოს ექსპერტები პაატა გაფრინდაშვილი და ნიკოლოზ ანთიძე, კონსტრუკტორები გიგლა ჭანუყვაძე, გოგი გორდელაძე, ხელოვნებათმცოდნეები გიორგი გაგოშიძე, გიგა მისრიაშვილი და გეოლოგი გურამ ჩიქოვანი მომხდარს დეტალურად შეისწავლიან და არსებული მდგომარეობიდან გამომდინარე კვლევითი სამუშაოების დაწყების თარიღს განსაზღვრავენ, რადგან ამ ეტაპზე დამეწყრილ ტერიტორიაზე შესვლა საფრთხეს წარმოადგენს და შესაბამისად ართულებს ფუნდამეტური კვლევის განხორიელებას.
გუშინ 28 აპრილს საქართველოს კულტურული მემკვიდრეობის დაცვის ეროვნული სააგენტოს ექპსპერტებმა ძეგლის მდგომარეობის გადადუბელ დაზვერვითი სამუშაოები განახორციელეს. ბებრისციხის მდგომარეობა უკვე შეაფასა საქართველოს კულტურის, ძეგთა დაცვისა და სპორტის მინისტრის პირველმა მოადგილე დავით ცხადაძემ.
ციხე აგებულია ადრინდელ ფეოდალურ ხანაში. ბებრისციხე ქართულ საისტორიო წყაროებში პირველად მოხსენიებულია ლაშა გიორგის დროინდელ მემატიანესთან: "დემეტრე მეფე ბებრის ციხეს მიიცვალა და გელათს წაიყვანეს მისგანვე კურთხეულსა ახალსა მონასტერსა". ეს მოხდა 1156 წელს.
ვახუშტი ბაგრატიონი მას ბელტის ციხედ მოიხსენიებს. კედლები თითქმის თანაბარი ქვებითაა ნაშენი. ციხის მთავარი ნაწილი იყო ციტადელი, რომელსაც სამხრეთით ვრცელი სამკუთხა ეზო ეკვროდა, სამივე კუთხესა და გალავნის ბოლოში კოშკები იყო აღმართული. ბებრისციხის მიდამოებში დადასტურებულია ანტიკური ფეოდალური ხანის არქეოლოგიური ფენები. ციხე-სიმაგრის საერთო ფართი დაახლოებით 1500 კვ.მ-ია შიდა ეზოსი კი 600 კვ-მეტრი.
