იუსტიციის მინისტრი თეა წულუკიანი რუსეთის იუსტიციის სამინისტროს განცხადებას ეხმიანება და აცხადებს, რომ ქართული სახელმწიფო დადგენილი ნორმებისა და ვადების ფარგლებში მოქმედებს. როგორც მინისტრმა ,,რუსთავი-2”-თან საუბარში განაცხადა, სტრასბურგის სასამართლო ამ კვირაში გადააგზავნის ქართული მხარის მოთხოვნას რუსეთის იუსტიციის სამინისტროში.
,,სტრასბურგის სასამართლოს რეგლამენტის თანახმად, მხარეები ერთმანეთთან პროცედურის ამ ეტაპზე არ ურთიერთობენ, ეს ურთიერთობა ხდება მხოლოდ სასამართლოს გავლით. Aსასამართლო ადგენს ვადას და ამ ვადაში საქართველომ სახელმწიფომ როგორც მხარემ, დადგენილ ვადაში სტრასბურგის სასამართლოს გაუგზავნა თავისი მოთხოვნა, რომელიც შეეხება კომპენსაციის სახით რუსეთის მხრიდან 70 მილიონ 320 ათასი ევროს მოთხოვნას. სტრასბურგის სასამართლო როგორც დღეს შეგვატყობინეს ამ კვირაში გადააგზავნის ჩვენს მოთხოვნას რუსეთის იუსტიციის სამინისტროში და მას მოსთხოვს არგუმენტებს, ან კონტრარგუმენტებს ან კომენტარებს ჩვენს მიერ წარდგენილ პოზიციაზე”, _განაცხადა წულუკიანმა.
მოსკოვს 2006 წელს ქართველების მასობრივი დეპორტაციის საქმეზე კომპენსაციის შესახებ ქართული მხარისგან არანაირი მოთხოვნა არ მიუღია.
ინფორმაციას ,,რია ნოვოსტი” რუსეთის იუსტიციის სამინისტროზე დაყრდნობით ავრცელებს.
თბილისი მოსკოვისგან 70 მილიონ 300 ათას ევროს ითხოვს.
რუსეთის იუსტიციის სამინისტროში აცხადებენ, რომ 2015 წლის 6 ივლისის მდგომარეობით, რუსეთის მისამართით საქართველოს ხელისუფლების მხრიდან კომპენსაციების გადახდის შესახებ მოთხოვნა არ შესულა.
უწყების განცხადებით, რუსეთის პოზიცია ამ საკითხთან დაკავშირებით მხოლოდ მას შემდეგ გახმოვანდება, როცა სტრასბურგის სასამართლო მოსკოვს ოფიციალურად გააცნობს ქართული მხარეს წინადადებებს.
