მათი ინფორმაციით, სათესლე მასალის გადაცემის ოფიციალური ცერემონიალი ხვალ, 29 აპრილს 11:00 საათზე ტერმინალ "ლილო-1"-ში გაიმართება, რომელსაც აშშ-ის ელჩი საქართველოში ჯონ ბასი, საქართველოს სოფლის მეურნეობის მინისტრი ბაკურ კვეზერელი, ლტოლვითა და განსახლების მინისტრი კობა სუბელიანი და კომპანია "Pioneer Hi-Bred Seedss"-ის წარმომადგენლები დაესწრებიან.

კომპანია "პიონერი" USAID-ის მიერ დაფინანსებული "მექანიზაციის პროექტის" (AMP) ფარგლებში, 68 ათასი აშშ დოლარის ღირებულების სიმინდის სათესლე მასალას საჩუქრად 2008 წლის აგვისტოს კონფლიქტის შედეგად დაზარალებულ იძულებით გადაადგილებულ პირებს გადასცემს.

პროექტი საქართველოს მასშტაბით 30-მდე სამანქანო სერვისცენტრის შექმნას ითვალისწინებს, რაც მცირე ფერმერებისთვის სამანქანო მომსახურების მიღების შესაძლებლობებს მნიშვნელოვნად გაზრდის.

სერვისცენტრები, რომლებიც `მექანიზაციის პროექტის" მხარდაჭერით შეიქმნება საგაზაფხულო თესვის დროს უფასო სამანქანო მომსახურებას გაუწევენ კონფლიქტის შედეგად დაზარალებულ დაახლოებით 1 900 იძულებით გადაადგილებულ ოჯახს.

USAID-ის მიერ დაფინანსებული "მექანიზაციის პროექტის" ბიუჯეტი 5.1 მლნ დოლარია, რაც 2008 წლის აგვისტოს კონფლიქტის შედეგად დაზარალებული ქართველი ხალხის მხარდასაჭერად აშშ-ის მთავრობის მიერ გაღებული 1 მლრდ აშშ დოლარის დახმარების ფარგლებში ხორციელდება.