საპარლამენტო ოპოზიციის წარმომადგენელი გია ცაგარეიშვილი პარლამენტს კონსტიტუციის დარღვევაში ადანაშაულებს და საკუთარი საკანონმდებლო ინიციატივის პირდაპირ სესიაზე განხილვას ითხოვს. ამის შესახებ განცხადება გია ცაგარეიშვილმა დღეს პარლამენტში საგანგებოდ გამართულ ბრიფინგზე გააკეთა.
როგორც მან აღნიშნა, 26 თებერვალს პარლამენტის საორგანიზაციო დეპარტამენტს ჩააბარა მის მიერ მომზადებული საკანონმდებლო ინიციატივა, რომელიც საარჩევნო დანაშაულებებზე სანქციების გამკაცრებას და აღნიშნულ დანაშაულებებზე სისხლის სამართლებრივი პასუხისმგებლობის ხანდაზმულობის ვადის გაზრდას ითვალისწინებს.
ცაგარეიშვილის განმარტებით, ბიურომ მიიღო გადაწყვეტილება რომ აღნიშნული ინიციატივა იურიდიულ კომიტეტს უნდა განეხილა 16-19 მარტის ფარგლებში და პლენარულ სხდომაზე კი უნდა განხილულიყო 23-26 მარტს. ცაგარეიშვილი აცხადებს, რომ კანონპროექტის განხილვა არა თუ სესიაზე არ მომხდარა, კომიტეტსაც კი არ დაუწყია.
როგორც ცაგარეიშილი აცხადებს, იგი იურიდიულ საკითხთა კომიტეტის თავმჯდომარის მოადგილესთან ლაშა თორდიასთან შეეცადა გაერკვია თუ რატომ არ ხდება კანონპროექტის განხილვა და როგორც ცაგარეიშვილი აღნიშნავს, თორდიას მისთვის უთქვამს რომ ამ კანონპროექტის განხილვა საგაზაფხულო სესიაზე ვეღარ მოესწრება.
"ეს იმას ნიშნავს ხელისუფლება არჩევნების გაყალბებისთვის სერიოზულად ემზადება და გაყალბების სანქციებზე მსჯელობისთვისაც კი არ არის მზად", _ აცხადებს ცაგარეიშვილი და აღნიშნავს, რომ მას სადეპუტატო უფლებამოსილების განხორციელებაში უშლიან ხელს.
"რეგლამენტი მაძლევს მე ამის საშუალებას და კუბლაშვილებს და თორდიებს არ მივცემ რეგლამენტის ისე წაკითხვის საშუალებას როგორც თავად სურთ". როგორც ცაგარეიშვილი განმარტავს, რეგლამენტის თანახმად იმ შემთხვევაში თუკი წამყვანი კომიტეტი ბიუროს დავალებას არ ასრულებს და დადგენილ ვადაში არ იხილავს საკანონმდებლო ინიციატივას, ინიციატივის ავტორს უფლება აქვს მიმართოს ბიუროს და მოითხოვოს ინიციატივის პირდაპირ სესიაზე განხილვა კომიტეტის გვერდის ავლით.
იმ შემთხვევაში კი თუ ბიუროც არ მიიღებს კანონროექტის განხილვის გადაწყვეტილებას, პარლამენტის რეგლამენტი იძლევა საშუალებას რომ კანონპროექტის დაჩქარებული წესით განხილვა სესიაზე დააყენოს და სესია ვალდებულია კანონპროექტი განიხილოს.
როგორც ცაგარეიშვილი განმარტავს იგი ბიუროს აღნიშნული განცხადებით დღესვე მიმართავს და იმედოვნებს, რომ მომავალი კვირის სამშაბათისათვის დანიშნულ რიგგარეშე პლენარულ სხდომაზე მისი ინიციატივის განხილვა იქნება შესაძლებელი.
რაც შეეხება თავად საკანონდემლო ინიციატივას, სანქციები იზრდება ყველა ტიპის საარჩევნო დანაშაულზე. რაც შეეხება ხანდაზმულობის ვადას, დღეს მოქმედი კანონმდებლობით საარჩევნო დანაშაულის ჩამდენი პირის მიმართ სისხლის სამართლის საქმე აღარ აღიძრება თუ დანაშაულიდან გასულია ორი წევრი. ცაგარეიშვილი კი ამ ვადის 15 წლამდე გაზრდას ითხოვს.
